لاہور: پنجاب حکومت نے بلدیاتی اداروں کو بحال کرنے کے معاملے پر سپریم کورٹ میں نظر ثانی کی درخواست دائر کردی۔

چیف سیکریٹری پنجاب نے عدالت عظمیٰ میں نظرثانی کی اپیل دائر کی۔

مزید پڑھیں: سپریم کورٹ کا پنجاب کے بلدیاتی ادارے بحال کرنے کا حکم

دائر کردہ نظرثانی اپیل میں پنجاب حکومت نے مؤقف اختیار کیا کہ عدالت عظمی 25 مارچ کے فیصلے پر نظرثانی کرے۔

درخواست میں کہا گیا کہ 2013 کی حلقہ بندیاں متروک ہو چکی ہیں اور پنجاب بھر میں نئی حلقہ بندیاں کر دی گئی ہیں۔

پنجاب حکومت نے سپریم کورٹ میں مؤقف اختیار کیا کہ صرف چند ماہ کے لیے بلدیاتی اداروں کو بحال کرنے سے اربوں روپے کا زیاں ہوگا۔

یہ بھی پڑھیں: پنجاب حکومت کا بلدیاتی آرڈیننس سپریم کورٹ پر حملہ ہے، جسٹس قاضی فائز عیسیٰ

انہوں نے عدالت سے استدعا کی کہ 25 مارچ کے بلدیاتی اداروں کو بحال کرنے کے حکم کو کالعدم قرار دے۔

خیال رہے کہ سپریم کورٹ نے پاکستان تحریک انصاف (پی ٹی آئی) کی صوبائی حکومت کے بلدیاتی ایکٹ کے سیکشن 3 کو آئین سے متصادم قرار دیتے ہوئے پنجاب کے بلدیاتی ادارے بحال کرنے کا حکم دے دیا تھا۔

چیف جسٹس گلزار احمد کی سربراہی میں سپریم کورٹ کے 3 رکنی بینچ نے بلدیاتی انتحابات سے متعلق کیس کی سماعت کی تھی۔

عدالت نے مسلم لیگ (ن) کے رہنما دانیال عزیز کی درخواست منظور کرتے ہوئے پنجاب کے بلدیاتی اداروں کو بحال کرنے کا حکم دے دیا۔

یہ بھی پڑھیں: الیکشن کمیشن کی بلدیاتی انتخابات 3مراحل میں کرانے کی تجویز

قبل ازیں جسٹس قاضی فائز عیسیٰ نے 15 مارچ کو بلدیاتی انتخابات سے متعلق کیس کی سماعت میں صوبائی حکومت کے آرڈیننس کو آئین کی خلاف ورزی قرار دیتے ہوئے کہا تھا کہ پنجاب حکومت کا بلدیاتی آرڈیننس سپریم کورٹ پر حملہ ہے۔

جسٹس قاضی فائز عیسیٰ نے کیس کی مزید سماعت کے لیے 3 رکنی بینچ تشکیل دینے کا معاملہ چیف جسٹس کو بھجوا دیا تھا اور ہدایت کی تھی کہ رجسٹرار سپریم کورٹ بینچ تشکیل دینے کے لیے فائل جلد از جلد چیف جسٹس کو بھجوائیں۔