ٹی20 ورلڈ کپ: سپر 12 مرحلے میں پہنچنے والی بقیہ چار ٹیموں کے نام بھی فائنل
ٹی20 ورلڈ کپ کے سپر 12 راؤنڈ میں پہنچنے والی چار ٹیموں کا فیصلہ ہو گیا ہے اور سری لنکا اور نیدرلینڈز کے ساتھ ساتھ آئرلینڈ اور زمبابوے کی ٹیموں نے اگلے مرحلے کے لیے کوالیفائی کر لیا ہے۔
آسٹریلیا میں جاری ٹی20 ورلڈ کپ کے پہلے مرحلے میں گزشتہ روز سری لنکا اور نیدرلینڈز کی ٹیم نے اگلے مرحلے میں جگہ بنا لی تھی۔
آج آئرلینڈ کی ٹیم نے عمدہ کارکردگی کا مظاہرہ کرتے ہوئے دو مرتبہ کی چیمپیئن ویسٹ انڈیز کو باآسانی 9 وکٹوں سے شکست دے کر ٹی20 ورلڈ کپ سے باہر کردیا اور سپر 12 مرحلے میں جگہ بنا لی۔
آج کھیلے گئے دوسرے میچ میں زمبابوے نے فیصلہ کن معرکے میں اسکاٹ لینڈ کو مات دے کر ٹی20 ورلڈ کپ کے فائنل مرحلے میں جگہ بنا لی۔
اس کے ساتھ ہی سپر 12 راؤنڈ کی تمام ٹیموں کا فیصلہ ہو گیا ہے۔
ٹی20 ورلڈ کپ کے گروپ 1 میں افغانستان، آسٹریلیا، انگلینڈ، نیوزی لینڈ کے ساتھ ساتھ سری لنکا اور آئرلینڈ کی ٹیمیں شامل ہیں جس کے ساتھ ہی یہ ’گروپ آف ڈیتھ‘ کی شکل اختیار کر گیا ہے جس میں تمام ٹیموں کے درمیان دلچسپ مقابلے کی توقع ہے۔
گروپ 2 میں پاکستان کے ہمراہ بھارت، جنوبی افریقہ، بنگلہ دیش، زمبابوے اور نیدرلینڈز کی ٹیمیں موجود ہیں۔
لائیو ٹی وی