پی سی بی کے الیکشن کمشنر شاہ خاور بورڈ کے قائم مقام چیئرمین مقرر
پاکستان کرکٹ بورڈ (پی سی بی) کے الیکشن کمشنر شاہ خاور کو بورڈ کا قائم مقام چیئرمین مقرر کردیا گیا۔
ڈان نیوز کے مطابق ذکا اشرف کا استعفیٰ منظور ہونے پر شاہ خاور قائم مقام چیئرمین تعینات ہوئے ہیں۔
پی سی بی کے چیئرمین کا الیکشن فروری کے پہلے ہفتے میں منعقد ہونے کا امکان ہے۔
دوسری جانب وزارت بین الصوبائی رابطہ کمیٹی نے نگران وزیر اعلیٰ پنجاب محسن نقوی کو پی سی بی بورڈ آف گورنر کا رکن نامزد کردیا جس کا نوٹی فکیشن جاری کردیا گیا ہے۔
واضح رہے کہ گزشتہ ہفتے پاکستان کرکٹ بورڈ کی مینجمنٹ کمیٹی کے چیئرمین ذکا اشرف نے اپنی مدت ملازمت ختم ہونے سے قبل ہی عہدے سے استعفیٰ دے دیا تھا۔
نگران وفاقی وزیر فواد حسن فواد نے ’ڈان نیوز‘ سے خصوصی گفتگو کرتے ہوئے بتایا تھا کہ ذکا اشرف نے اپنا استعفیٰ پی سی بی کے پیٹرن ان چیف کو بھیج دیا ہے۔
انہوں نے کہا کہ پی سی بی مینجمنٹ کمیٹی کو جن معاملات کی اجازت تھی انہیں وہ تمام امور کرنے دیے گئے اور ان معاملات سے روکا تھا جن کی اجازت نہیں تھی۔
گزشتہ روز نگران وزیر اعلیٰ پنجاب محسن نقوی کو کرکٹ بورڈ کا چیئرمین مقرر کرنے کا فیصلہ سامنے آیا تھا۔
ذرائع کا کہنا تھا کہ نگران وفاقی حکومت نے نگران وزیر اعلیٰ پنجاب محسن نقوی کو پی سی بی کا چیئرمین مقرر کرنے کا فیصلہ کیا ہے جبکہ ذکا اشرف کا استعفی منظور کر لیا گیا ہے۔
لائیو ٹی وی