سری لنکن بلائنڈ کرکٹ کو این او سی اجرا میں تاخیر، ٹرائینگولر سیریز ختم، پاک بھارت میچز کا فیصلہ
سری لنکن بلائنڈ کرکٹ کو حکومت کی جانب سے نو آبجیکشن سرٹیفکیٹ (این او سی) اجرا میں تاخیر کے باعث ٹرائینگولر سیریز ختم کرکے پاک بھارت ٹیموں کے درمیان میچز کرانے کا فیصلہ کرلیا گیا۔
’ڈان نیوز‘ کے مطابق سہ ملکی بلائنڈ کرکٹ سیریز میں سری لنکن سہ ملکی کرکٹ سیریز سے آؤٹ ہو گئی، سری لنکن حکومت نے اپنی کرکٹ ٹیم کو این او سی تاخیر سے جاری کیا، بروقت این او سی نہ ملنے کے باعث سری لنکن بلائنڈ ٹیم نے دبئی جانے والی اپنی فلائٹ مس کردی۔
اس تمام صورتحال میں سیریز کی آرگنائزنگ کمیٹی نے ٹرائینگولر سیریز کے بجائے روایتی حریفوں پاکستان اور بھارت کی بلائنڈ کرکٹ ٹیموں کے درمیان دو طرفہ سیریز کرانے کا فیصلہ کیا۔
اس حوالے سے چیئرمین انڈین بلائنڈ کرکٹ ایسوسی ایشن مہانتیش جی نے کہا کہ فیصلہ دونوں ممالک کی مشاورت سے ہوا۔
چیئرمین پاکستان بلائنڈ کرکٹ کونسل سلطان شاہ نے کہا کہ سری لنکن ٹیم کے نہ آنے پر افسوس ہے، پاکستان اور بھارت کے درمیان تین میچوں کی ٹی 20 سیریز ہوگی۔
سلطان شاہ نے کہا کہ پاک بھارت پہلا ٹاکرا آج کھیلا جائے گا، دوسرا میچ 23فروری، تیسرا میچ 25 فروری کو کھیلا جائے گا۔
پاک بھارت بلائنڈ سیریز انٹرنیشنل کرکٹ کونسل (آئی سی سی) کرکٹ اکیڈمی دبئی میں ہوگی۔
لائیو ٹی وی