بشریٰ انصاری کی عمران اشرف اور سجل علی کی شادی کروانے کی خبروں پر وضاحت

انٹرٹینمنٹ ڈیسک شائع December 10, 2024

سینیئر اداکارہ بشریٰ انصاری نے اداکارہ سجل علی اور عمران اشرف کی شادی کروانے کی خبروں پر دلچسپ رد عمل دیتے ہوئے کہا ہے کہ خبروں کے مطابق انہوں نے دونوں اداکاروں سے ملے بغیر ان کی شادی کروادی۔

بشریٰ انصاری نے حال ہی میں آرٹس کونسل کراچی کی جانب سے منعقد ہونے والی سترہویں اردو کانفرنس کے ایک سیشن میں شرکت کی، جہاں عمران اشرف نے سیشن کی میزبانی کی۔

مذکورہ سیشن کے دوران مختلف معاملات پر بات کرتے ہوئے بشریٰ انصاری نے عمران اشرف کو حیران کن خبر بھی سنائی۔

بشریٰ انصاری نے عمران اشرف کو بتایا کہ سوشل میڈیا پر خبریں پھیل رہی ہیں کہ میں نے سجل علی اور عمران اشرف کی شادی کروادی۔

اس پر عمران اشرف نے حیرانگی کا اظہار کرتے ہوئے کہا کہ سجل علی ان کی بہنوں کی طرح ہیں، ایسی خبریں نہ پھیلائیں۔

ساتھ ہی عمران اشرف نے اپنے حوالے سے مزید وضاحت کی کہ انہوں نے شادی کی اور نہ ہی فوری طور پر ان کا شادی کا ارادہ ہے۔

ان کی بات پر بشریٰ انصاری نے انہیں کہا کہ اب وقت آگیا ہے کہ وہ شادی کے بندھن میں بندھ جائیں۔

بشریٰ انصاری نے عمران اشرف کو مزید ترغیب دی کہ وہ کسی خاتون کے ساتھ بھاگ جائیں، پھر ان سے شادی رچالیں، پھر سب ان کی شادی کو قبول کرلیں گے۔

اس پر عمران اشرف نے کہا کہ ان کا ایسا کوئی ارادہ نہیں اور یہ کہ بشریٰ انصاری اور ان کے شوہر سے ان کا احترام اور عزت کا تعلق ہے، دونوں سے ان کی شوبز انڈسٹری میں سب سے اچھی دوستی ہے۔

خیال رہے کہ عمران اشرف کی ماڈل کرن اشفاق سے اکتوبر 2022 میں طلاق ہوگئی تھی، دونوں نے 2018 میں شادی کی تھی اور ان کے ہاں 2020 میں پہلے بچے کی پیدائش ہوئی تھی۔

بعد ازاں ماڈل کرن اشفاق نے دسمبر 2023 میں سیاسی رہنما حمزہ علی چوہدری سے شادی کی تھی اور اکتوبر 2024 میں ان کے ہاں دوسرے شوہر سے پہلے بچے کی پیدائش ہوئی تھی۔

دوسری جانب سجل علی اور احد رضا میر کے درمیان بھی گزشتہ دو سال سے 2022 سے طلاق کی افواہیں ہیں، تاہم دونوں نے اس پر بات نہیں کی۔

احد رضا میر اور سجل علی نے مارچ 2020 میں شادی کی تھی، تاہم دونوں میں جلد اختلافات کی خبریں سامنے آنے لگیں اور مبینہ طور پر 2022 میں ان کے درمیان طلاق ہوگئی، تاہم دونوں نے خود کبھی اس پر بات نہیں کی لیکن متعدد شوبز شخصیات ان کی طلاق کی مبہم تصدیق کر چکی ہیں۔

طلاق کے بعد گزشتہ کچھ عرصے سے احد رضا میر کی ساتھی اداکارہ رمشا خان سے تعلقات کی افواہیں بھی زیر گردش ہیں لیکن اس پر بھی احد رضا میر اور رمشا خان نے کوئی وضاحت نہیں دی۔