ہانیہ عامر سے ملنے پاکستان جا رہی ہوں، راکھی ساونت کی ویڈیو وائرل
بولی وڈ کی متنازع اداکارہ راکھی ساونت کی جانب سے ایئرپورٹ پر بنائی گئی ویڈیوز وائرل ہوگئیں، جن میں وہ پاکستان جانے، ہانیہ عامر، نرگس اور دیدار سے ملنے کی بات کرتی دکھائی دیتی ہیں۔
سوشل میڈیا پر وائرل مذکورہ ویڈیوز بظاہر متحدہ عرب امارات (یو اے ای) کی ریاست دبئی کے ایئرپورٹ پر بنائی گئیں، جن میں راکھی ساونت دعویٰ کرتی دکھائی دیں کہ وہ پاکستان جا رہی ہیں۔
وائرل ویڈیوز میں راکھی ساونت کے ہاتھ میں بھارتی پاسپورٹ بھی ہے اور وہ دوڑ کر مداحوں کو بتاتی دکھائی دیتی ہیں کہ وہ پاکستان جا رہی ہیں۔
ایک ویڈیو میں راکھی ساونت بتاتی ہیں کہ وہ ہانیہ عامر، نرگس اور دیدار سے ملنے پاکستان جا رہی ہیں۔
اس سے قبل اداکارہ نے اپنے انسٹاگرام پر ایک ویڈیو شیئر کی تھی، جس میں انہوں نے بھارتی وزیر اعظم نریندر مودی کو مخاطب ہوتے ہوئے ان سے ٹک ٹاک کھولنے کا مطالبہ کیا تھا، دوسری صورت میں انہوں نے پاکستان چلے جانے کی دھمکی بھی دی۔
اداکارہ نے اپنے ویڈیو پیغام میں کہا کہ اگر نریندر مودی نے بھارت میں ٹک ٹاک بحال نہ کیا تو وہ پاکستان چلی جائیں گی۔
ویڈیو میں وہ بھارتی وزیر اعظم کو مخاطب کرتے ہوئے کہہ رہی ہیں کہ ’مجھے دبئی میں نہیں رہنا، اگر ٹرمپ کی طرح آپ نے بھی ٹک ٹاک پر سے پابندی نہیں اٹھائی تو میں بھارت چھوڑ کر پاکستان چلی جاؤں گی۔‘
اداکارہ کا کہنا تھا کہ میں پاکستان جا کرشادی کرلوں گی، وہاں حلوا پوری کھاؤں گی، اُنہوں نے کہا کہ پوری دنیا ٹک ٹاک سے پیسہ کما رہی ہے، بھارت میں لوگ بے روزگار بیٹھے ہیں۔
اداکارہ کا کہنا تھا کہ ’میں جا رہی ہوں ہانیہ سے ملنے، نرگس سے ملنے، دیدار سے ملنے۔۔ہانیہ! مجھے ایئر پورٹ پر پک کرنے آجاؤ۔‘
واضح رہے کہ سوشل میڈیا پر راکھی ساونت اور ہانیہ عامر کے درمیان ویڈیوز پیغامات کا سلسلہ بھی جاری ہے جس پر صارفین کی جانب سے دلچسپ ردعمل بھی سامنے آرہے ہیں۔
ہانیہ عامر کا ان پیغامات سے محظوظ ہوتے ہوئے کہنا ہے ’میں صرف یہ کہنا چاہتی ہوں کہ پہلے میری زندگی بہت غمگین تھی اور پھر میری زندگی میں راکھی ساونت آگئیں، راکھی جی میں آپ کو ائیر پورٹ لینے آرہی ہوں‘۔
اس قبل راکھی ساونت پاکستانی اسٹار کرکٹر اور سوئنگ کے سلطان وسیم اکرم کے ساتھ آئٹم سونگ کرنے کی انوکھی خواہش کا اظہار بھی کر چکی ہیں۔
پاکستانی یوٹیوبر کو دیئے جانے والے ایک انٹرویو میں اداکارہ کا کہنا تھا کہ ’وسیم اکرم مجھ سے مل کر پانی پانی ہوگئے تھے۔‘
پاکستانی مداحوں سے اظہار محبت کرتے ہوئے ان کا کہنا تھا کہ انہوں ایک طرح پاکستانیوں کا نمک کھایا ہے۔
پاکستان میں ان کے بہت سارے مداح ہیں جو سوشل میڈیا پلیٹ فارمز پر انہیں ڈیجیٹل تحائف بھی بھیجتے ہیں، اسی وجہ سے وہ کہتی ہیں کہ انہوں نے پاکستان کا نمک کھایا ہے۔
انٹرویو کے دوران انہوں نے پاکستانی ڈانسرز اور اداکاراؤں کو ڈانس چیلنج بھی کیا اور ساتھ ہی دعویٰ کیا کہ وہ پاکستانی رقاصاؤں کو پیچھے چھوڑ دیں گی۔
لائیو ٹی وی