گوہررشید اور کبریٰ خان نے شادی سے متعلق نئی ویڈیو شیئر کردی
اداکار گوہررشید اور اداکارہ کبریٰ خان نے اپنی شادی کی چہ مگوئیوں کے دوران شادی کی تیاریوں سے متعلق نئی ویڈیو شیئر کردی، جس کے بعد ان کی شادی کی افواہیں مزید زور پکڑ گئیں۔
گزشتہ کچھ دنوں سے مقبول اداکارہ کبریٰ خان اور گوہر رشید کی شادی کی خبریں سوشل میڈیا پر زیر گردش ہیں، جب کہ اداکاروں کی جانب سے وقتاً بوقتاً سوشل میڈیا پر شیئر کی جانے والی مبہم ویڈیوز نے بھی شادی کی خبروں کو مزید ہوا دی۔
افواہوں کے بعد دونوں اداکاروں نے انسٹا گرام پر نئی ویڈیو شیئر کی، جس میں متعدد شوبز شخصیات کہتی دکھائی دیں کہ ان کے یاروں کی شادی ہونے والی ہے جب کہ ویڈیو میں کبریٰ خان اور گوہر رشید نے بھی مبہم انداز میں اپنی شادی کی اشاروں اشاروں میں بات کی۔
دونوں نے ایک ہی ویڈیو کو شیئر کرتے ہوئے کیپشن میں لکھا کہ ’آپ کے پیار اور دعاؤں کے ساتھ بسم اللہ ’
ویڈیو میں مومل شیخ، شہزاد شیخ، ہمایوں سعید ان کی اہلیہ اور دیگر فن کاروں کو ’میرے یار کی شادی‘ پر منفرد انداز میں اظہار خیال کرتے دیکھا جا سکتا ہے۔
ویڈیو کے اختتام پر گوہر رشید اور کبریٰ خان ایک جیسے لباس میں دکھائی دیتے ہیں، جو اشاروں میں مبہم انداز میں بتاتے ہیں کہ ان کی یا ان کے کسی یار کی شادی ہونے والی ہے۔
اداکاروں کے ویڈیو شیئر کرنے کے بعد سوشل میڈیا صارفین کی جانب سے دونوں کے لیے نیک تمناؤں اور خوشی کا اظہار کیا گیا جب کہ شوبز شخصیات نے بھی ان کی ویڈیوز پر مبارک باد کے کمنٹس کیے۔
واضح رہے کہ گوہر رشید کی جانب سے رواں ماہ کے آغاز میں اپنے انسٹاگرام پر شادی کی تقریبات کی مبہم ویڈیوز شیئر کیے جانے کے بعد سے ان کی شادی کی چہ مگوئیاں شروع ہوگئی تھیں۔
ماضی میں گوہر رشید اور کبریٰ خان کے درمیان تعلقات اور ان کی شادی کی چہ مگوئیاں بھی کی جاتی رہی ہیں، جس پر دونوں نے مبہم انداز میں کہا تھا کہ ان کے درمیان صرف اچھی دوستی ہے۔
دوسری جانب متعدد شوبز ویب سائٹس اور یوٹیوبرز نے دعویٰ کیا ہے کہ آئندہ ماہ فروری میں نہ صرف گوہر رشید اور کبریٰ خان بلکہ دیگر دو شوبز شخصیات بھی شادی کے بندھن میں بندھنے والی ہیں۔
ایک ویب سائٹ نے اپنی رپورٹ میں بتایا تھا کہ ممکنہ طور پر گوہر رشید اور کبریٰ خان فروری کے اختتام تک شادی کے بندھن میں بندھ جائیں گے۔
لائیو ٹی وی