سپریم کورٹ میں 6 مستقل ججز اور ایک قائم مقام جج نے اپنے عہدے کا حلف اٹھا لیا، چیف جسٹس یحییٰ آفریدی نے ججز سے حلف لیا، پہلی بار تقریب حلف برداری سپریم کورٹ کے سبزہ زار میں منعقد کی گئی۔

ڈان نیوز کے مطابق سپریم کورٹ میں 6 نئے مستقل ججز اور ایک قائم مقام جج نے اپنے عہدے کا حلف اٹھا لیا، چیف جسٹس آف پاکستان جسٹس یحییٰ آفریدی نے ججز سے ان کے عہدے کا حلف لیا۔

حلف اٹھانے والے 6 مستقل ججز میں جسٹس عامر فاروق، جسٹس اشتیاق ابراہیم، جسٹس شکیل احمد، جسٹس شفیع صدیقی، جسٹس صلاح الدین پنہور اور جسٹس ہاشم کاکڑ شامل ہیں۔

جسٹس میاں گل حسن اورنگزیب نے بھی بطور قائم مقام جج سپریم کورٹ اپنے عہدے کا حلف اٹھایا، چیف جسٹس آف پاکستان جسٹس یحییٰ آفریدی نے جسٹس میاں گل حسن اورنگزیب سے قائم مقام جج کے عہدے کا حلف لیا۔

سپریم کورٹ میں پہلی بار تقریب حلف برداری عدالتی احاطے کے سبزہ زار میں منعقد ہوئی جس میں سپریم کورٹ اور ہائی کورٹ کے ججز صاحبان، اٹارنی جنرل، ججز کے اہلخانہ، پاکستان بار کونسل، سپریم کورٹ بار کونسل کے عہدیداران اور وکلا کی بڑی تعداد نے شرکت کی۔

ہائیکورٹس کے قائم مقام چیف جسٹس صاحبان نے بھی حلف اٹھالیا

دریں اثنا، اسلام آباد ہائی کورٹ کے جسٹس سردار محمد سرفراز ڈوگر نے قائم مقام چیف جسٹس اسلام آباد ہائی کورٹ کا حلف اٹھالیا۔

ایوان صدر میں منعقدہ تقریب حلف برداری میں صدر مملکت آصف علی زرداری نے جسٹس سردار محمد سرفراز ڈوگر سے قائم مقام چیف جسٹس کے عہدے کا حلف لیا۔ جسٹس سردار محمد سرفراز ڈوگر نئے چیف جسٹس کی تعیناتی تک قائم مقام چیف جسٹس کے فرائض انجام دیں گے۔

قبل ازیں، سندھ ہائی کورٹ کے جسٹس محمد جنید غفار نے قائم مقام چیف جسٹس کے عہدے کا حلف اٹھایا، گورنر ہاؤس کراچی میں منعقدہ تقریب حلف برداری میں گورنر سندھ کامران ٹیسوری نے جسٹس محمد جنید غفار سے قائم مقام چیف جسٹس کا حلف لیا۔

دریں اثنا، پشاور ہائی کورٹ کے قائم مقام چیف جسٹس سید محمد عتیق شاہ نے بھی گورنر ہاؤس خیبرپختونخوا میں منعقدہ تقریب حلف برداری میں اپنے عہدے کا حلف اٹھالیا۔

گورنر خیبرپختونخوا فیصل کریم کنڈی نے جسٹس سید محمد عتیق شاہ سے ان کے عہدے کا حلف لیا، اس موقع پر وزیراعلیٰ خیبرپختونخوا علی امین گنڈاپور بھی موجود تھے۔

علاوہ ازیں، بلوچستان ہائی کورٹ کے قائم مقام چیف جسٹس محمد اعجاز سواتی نے بھی اپنے عہدے کا حلف اٹھالیا، تقریب حلف برداری گورنر ہاؤس بلوچستان میں منعقد ہوئی جس میں گورنر بلوچستان نے قائم مقام چیف جسٹس محمد اعجاز سواتی سے حلف لیا۔