کراچی ایئرپورٹ پر عمرہ ویزوں کے ذریعے 4 خواتین کی سعودی عرب اسمگلنگ کی کوشش ناکام
وفاقی تحقیقاتی ادارے (ایف آئی اے) کے امیگریشن سرکل نے کراچی کے جناح انٹرنیشنل ایئر پورٹ پر کارروائی کرتے ہوئے 4 خواتین کی سعودی عرب اسمگلنگ کی کوشش ناکام بناتے ہوئے انہیں حراست میں لے لیا۔
ڈان نیوز کے مطابق ایف آئی اے کی جانب سے ابتدائی تفتیش کے بعد معلوم ہوا کہ بظاہر متاثرہ خواتین عمرہ ویزوں پر سعودی عرب جارہی تھیں، تاہم ان خواتین کو جبری مشقت کی غرض سے سعودی عرب بھجوایا جا رہا تھا۔
ایف آئی اے حکام کا کہنا ہے کہ گرفتار کی گئی خواتین شازیہ بانو، ظمیرا عظیم، لبنیٰ اور ثنا شہزادی عمرے کی ایک پرواز کی مسافر تھیں۔
امیگریشن حکام نے بتایا کہ متاثرہ خواتین اس سے قبل بھی سعودی عرب جا چکی تھیں، ان کو سعودی عرب بھجوانے میں آسیہ نامی خاتون ملوث ہے۔
ذرائع کے مطابق آسیہ نامی ملزمہ پنجاپ پولیس کی سابقہ ملازم ہے، آسیہ نے ہی متاثرہ چاروں خواتین کے سفری اخراجات برداشت کیے۔
حکام کا کہنا ہے کہ سعودی عرب میں قیام اور اخراجات کی سہولت کاری وسیم گجر نامی ایجنٹ کر رہا تھا، متاثرہ خواتین سے ایجنٹوں کے حوالے سے معلومات لی جا رہی ہیں۔
لائیو ٹی وی