انٹرنیشنل کرکٹ کونسل (آئی سی سی) چیمپئنز ٹرافی کے آٹھویں میچ میں افغانستان نے سنسنی خیز مقابلے کے بعد انگلینڈ کو 8 رنز سے شکست دے کر ٹورنامنٹ سے ہی باہر کردیا۔

لاہور کے قذاقی اسٹیڈیم میں کھیلے گئے میچ میں افغانستان نے ابراہیم زدران کی 177 رنز کی شاندار اننگز کی بدولت پہلے بیٹنگ کرتے ہوئے مقررہ 50 اوورز میں 7 وکٹوں کے نقصان پر 325 رنز بنائے۔

ہدف کے تعاقب میں انگلینڈ کی ابتدائی وکٹیں جلد گری تاہم جوروٹ کی سینچری کی بدولت میچ انتہائی دلچسپ رہا تاہم وہ اپنی ٹیم کو میچ نہیں جتواسکے اور پوری انگلش ٹیم آخری اوور میں 317 رنز پر آؤٹ ہوگئی۔

خیال رہے کہ ابراہیم زدران نے چند روز قبل انگلش بلے باز بین ڈکٹ کی جانب سے بنایا گیا چیمپئنز ٹرافی کا سب سے بڑا انفرادی اسکور کا ریکارڈ اپنے نام کرلیا جب کہ وہ ورلڈکپ کے بعد چیمپئنز ٹرافی میں بھی افغانستان کی جانب سے سینچری بنانے والے پہلے بلے باز بن گئے ہیں۔

انگلینڈ بیٹنگ

انگلینڈ کی جانب سے اننگز کا آغاز کرنے والے فل سالٹ صرف 12 رنز بنانے کے بعد عظمت اللہ عمرزئی کا شکار بن گئے جب کہ وکٹ کیپر لے باز جیمی اسمتھ بھی 9 رنز ہی بناسکے۔

آسٹریلیا کے خلاف ریکارڈ اننگز کھیلنے والے بین ڈکٹ بھی 38 رنز بنانے کے بعد راشد خان کے ہاتھوں آؤٹ ہوگئے جب کہ ہیری بروکس کو 25 رنز پر محمد نبی نے پویلین واپس بھیج دیا۔

انگلش بیٹر جو روٹ ایک اینڈ سے وکٹ پر ڈٹے رہے، انہوں نے اپنی نصف سینچری کو سینچری میں تبدیل کیا، تاہم وہ میچ فنش کرنے سے پہلے 46ویں اوور میں 111 گیندوں پر 120 رنز بنانے کے بعد آؤٹ ہوگئے، ان کی اننگز میں ایک چھکا اور 11 چوکے شامل تھے۔

کپتان جوز بٹلر 42 گیندوں پر 38 رنز کی اننگز کھیلنے کے بعد آؤٹ ہوئے جب کہ لیام لیون اسٹون صرف 10 رنز کے مہمان ثابت ہوئے، جیمی اورٹن 32 اور جوفرا آرچر 14 رنز بناسکے۔

افغانستان کی جانب سے عظمت اللہ عمرزئی نے 5، محمد نبی نے 2 جب کہ فضل الحق فاروقی، راشد خان اور گلبدین نائب نے ایک ایک وکٹ حاصل کی۔

افغانستان بیٹنگ

افغانستان نے اننگز کا آغاز کیا تو میچ کے چوتھے اوور کی پہلی گیند پر اوپنر رحمٰن اللہ گرباز 6 رنز بنانے کے بعد جوفرا آرچر کی گیند پر کلین بولڈ ہوگئے جب کہ اسی اوور کی پانچویں گیند پر صدیق اللہ اتل 4 رنز بناکر ایل بی ڈبلیو ہوگئے۔

افغانستان کی تیسری وکٹ بھی جوفرا آرچر کے حصے میں آئی جب 37 رنز کے مجموعی اسکور پر رحمت شاہ 4 رنز بنانے کے بعد راشد خان کے ہاتھوں کیچ آؤٹ ہوگئے۔

تاہم، ابتدائی 3 وکٹیں جلد گرنے کے باوجود افغان ٹیم پریشر میں نہیں آئی اور دوسرے اوپننگ بلے باز ابراہم زدران نے کپتان حشمت اللہ شاہدی کے ساتھ ملکر 103 رنز کی شراکت قائم کی۔ شاہدی 3 چھکوں اور ایک چوکے کی مدد سے 41 رنز بناکر عادل رشید کاشکار بنے۔

عظمت اللہ عمر زئی نے 31 گیندوں پر 3 چھکے اور ایک چوکے کی مدد سے 41 رنز کی اننگز کھیلی جب کہ محمد نبی نے بھی 24 گیندوں پر 40 رنز کی جارحانہ اننگز کھیلی جس میں 3 چھکے اور 2 چوکے شامل تھے۔

اننگز کا آغاز کرنے والے ابراہیم زدران 50ویں اوور کی پہلی گیند پر آؤٹ ہوئے، انہوں نے نہ صرف ون ڈے کریئر کی چھٹی سینچری مکمل کی بلکہ وہ 146 گیندوں پر 177 رنز کی یادگار اننگز کھیل کر آؤٹ ہوئے جس میں 6 چھکے اور 12 چوکے شامل تھے۔

انگلینڈ کی جانب سے جوفرا آرچر نے 3، لیام لیونگ اسٹون نے 2، جمی اوورٹن اور عادل رشید نے ایک، ایک وکٹ حاصل کی۔

واضح رہے کہ دونوں ٹیمیں اپنا پہلا میچ ہار چکی ہیں اور اگلے مرحلے میں رسائی کے لیے دونوں ٹیموں کو آج لازمی فتح درکار ہے، ہارنے والی ٹیم ایونٹ سے باہر ہوجائے گی۔

افغان ٹیم

ابراہیم زدران، رحمٰن اللہ گرباز، صدیق اللہ اتل، رحمت شاہ، حشمت اللہ شاہدی، عظمت اللہ عمرزئی، محمد نبی، گلبدین نائب، راشد خان، نور احمد اور فضل حق فاروقی پر مشتمل ہے۔

انگلش ٹیم

فل سالٹ، بین ڈکٹ، جیمی اسمتھ، جو روٹ، ہیری بروک، جوز بٹلر، لیام لیونگسٹن، جیمی اورٹن، جوفرا آرچر، عادل رشید اور مارک ووڈ پر مشتمل ہے۔