کیا کم کارڈیشین اور کینیا ویسٹ کے درمیان علیحدگی ہورہی ہے؟

انٹرٹینمنٹ ڈیسک شائع May 13, 2020

ان دونوں کی شادی 2014 میں ہوئی — فوٹو: انسٹاگرام

امریکی ماڈل، اداکارہ اور بزنس وومن کم کارڈیشین ویسٹ اور ان کے شوہر امریکی ریپر کینیا ویسٹ اس وقت لاس اینجلس میں خود کو اپنے گھر میں قرنطینہ کیے ہوئے ہیں۔

تاہم ایسی رپورٹس سامنے آرہی ہیں کہ اس دوران ان دونوں کے درمیان تعلقات اس حد تک کشیدہ ہوگئے ہیں کہ انہوں نے اپنے گھر کے دو الگ الگ حصوں میں رہنا شروع کردیا۔

دی بلاسٹ کی رپورٹ کے مطابق ایسی رپورٹس سامنے آنے کے بعد ان کے مداحوں میں یہ چہ مگوئیاں ہیں کہ جوڑے میں شاید علیحدگی ہی نہ ہوجائے۔

ان دنوں سامنے آئی رپورٹس کے مطابق کم اور کینیا کے درمیان بچوں کو لے کر اور گھر کی ذمہ داریوں کی وجہ سے بہت زیادہ جھگڑے ہورہے ہیں۔

رپورٹس میں مزید بتایا گیا کہ کم کو عموماً گھر میں رہنے کی عادت نہیں جس کی وجہ سے وہ اس دوران کافی غصے میں رہتی ہیں جبکہ بچوں کے ساتھ زیادہ وقت گزارنے کے بعد انہیں شوہر سے بھی بےحد شکایات ہیں کہ وہ بچوں کا ٹھیک سے خیال نہیں رکھتے۔

ان دونوں کی شادی 2014 میں ہوئی، فوٹو: اے ایف پی

اور یہی وجہ ہے کہ دونوں نے الگ الگ کمروں میں رہنے کا فیصلہ کرلیا ہے۔

رپورٹ میں مزید دعویٰ کیا گیا کہ کینیا ویسٹ اپنے کسی برانڈ کو بہت زیادہ وقت دے رہے ہیں جس کی وجہ سے کم ان سے ناراض ہیں کیون کہ وہ ان کے چاروں بچوں 6 سالہ نارتھ، 4 سالہ سینٹ، 2 سالہ شیکاگو اور 11 ماہ کے سالم کی دیکھ بھال میں بالکل مدد نہیں کررہے۔

یو ایس ویکلی کی رپورٹ کے مطابق قرنطینہ کے دوران ان دونوں کے درمیان بہت زیادہ جھگڑے ہورہے ہیں اور کینیا ویسٹ کم کو غصہ دلا رہے ہیں۔

جوڑے کی جانب سے اس حوالے سے کوئی بیان سامنے نہیں آیا۔

کم کا شمار امریکا کی کامیاب ماڈلز میں کیا جاتا ہے، فوٹو: اے ایف پی

البتہ اس دوران کم اپنے سوشل میڈیا اکاؤنٹس پر ایسی کئی تصاویر جاری کررہی ہیں جن میں وہ مختصر لباس میں موجود ہیں، رپورٹس کے مطابق کینیا کو سوشل میڈیا پر ایسی تصاویر شیئر کرنا پسند نہیں جن میں کم مختصر لباس میں موجود ہوں اور اس وجہ سے بھی ان کے درمیان کشیدگی کی رپورٹس نے جنم لینا شروع کردیا۔

یہ بھی پڑھیں: کم کارڈیشین کی 39ویں سالگرہ پر شوہر نے دیا سب سے ’قیمتی‘ تحفہ

خیال رہے کہ کم کارڈیشین ماڈلنگ کے ساتھ ساتھ قانون کی تعلیم بھی حاصل کررہی ہیں۔