اداکارہ ماورا حسین نے کہا ہے کہ انہیں نہیں پتہ کہ وہ کب شادی کریں گی، کیوں کہ والدین نے ان پر کبھی شادی کے لیے دباؤ نہیں ڈالا اور یہ کہ سب سے بہتر منصوبہ ساز خدا ہوتا ہے۔

ماورا حسین اپنی بہن عروہ حسین کے ہمراہ ندا یاسر کے رمضان پروگرام ’شانِ سحور‘ میں شریک ہوئیں جہاں دونوں نے اپنی خاندانی زندگی سمیت عوام کے پوچھے سوالوں کے جوابات بھی دیے۔

سوشل میڈیا پر لباس و اندار پر ہونے والی تنقید سے متعلق پوچھے گئے سوال کے جواب میں ماورا حسین نے کہا کہ وہ تنقید کرنے والوں کو جواب نہیں دیتیں، کیوں کہ وہ یہ سمجھتی ہیں کہ پبلک فگر ہونے کی وجہ سے عوام کو اپنی رائے کا اظہار کرنے کا پورا حق ہے۔

اداکارہ نے بتایا کہ وہ بعض اوقات لوگوں کی باتوں اور تنقید سے کچھ نہ کچھ نیا سیکھ کر خود میں تبدیلی لانے کی کوشش کرتی ہیں لیکن جو باتیں غلط اور قابلِ قبول نہیں لگتیں ان کو وہ نظر انداز کر دیتی ہیں۔

وکالت کی دنیا میں قدم رکھنے سے متعلق ایک سوال کے جواب میں انہوں نے بتایا کہ وہ فی الحال شوبز انڈسٹری میں کافی مصروف ہیں مگر وہ مستقبل میں بیریسٹر کی تعلیم حاصل کریں گی اور یہ کہ انہیں پریکٹیس سے زیادہ تعلیم حاصل کرتے رہنے کا شوق ہے۔

دونوں ایک ساتھ اسکرین پر دکھنے سے متعلق پوچھے جانے پر ماورا اور عروہ حسین نے بتایا کہ ہم دونوں تب ہی کسی پراجیکٹ میں ساتھ دکھنا پسند کریں گی کہ جب کوئی ایسا پراجیکٹ آفر ہو جس میں جیسا ہمارا رشتہ اصل میں ہے، ایسا ہی کردار ملے۔

شادی سے متعلق پوچھے گئے سوال پر ماورا حسین نے کہا کہ میرا یقین ہے کہ خدا کے منصوبے انسان کے منصوبوں سے کہیں بہتر ہوتے ہیں، میں یہ کیسے کہہ دوں کہ میری شادی اگلے ایک یا دو سال میں ہونے والی ہے، درحقیقت مجھے یہ علم تک نہیں کہ میرے ساتھ اگلے مہینے کیا ہونا ہے۔

انہوں نے مزید بتایا کہ شادی کے معاملے میں ان کی والدہ نے انہیں کبھی فورس نہیں کیا بلکہ وہ ہمیشہ شادی سے پہلے اپنے پاؤں پر کھڑے ہونے کا مشورہ دہتی ہیں۔

ماورا حسین نے اپنے ہونے والے شوہر کی ایسی 3 خوبیاں بھی بتائیں جن کا ہونا لازمی ہے، جس میں سب سے اہم یہ کہ وہ شخص اُن کی والدہ کو پسند آنا چاہیے، دوسرا سب کو عزت دینے والا ہو اور تیسرا اسے میری طرح ہی اپنی تعلیم اور اپنے کام کا جذبہ ہونا چاہیے۔