افریقی ممالک کے متنازع علاقے میں پاکستان امن دستے پر حملہ، سپاہی شہید
سوڈان اور جنوبی سوڈان کے درمیان متنازع علاقے ابائے میں پاکستانی امن دستے پر حملے میں پاک فوج کا سپاہی شہید جبکہ دو افسران سمیت 4 افراد زخمی ہوگئے۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق سوڈان اور جنوبی سوڈان کے متنازع علاقے ابائے میں تعینات پاکستان کا امن دستہ مقامی آبادی کے دو مریضوں کو ہسپتال لے جارہا تھا کہ ان پر فائرنگ کردی گئی۔
فائرنگ کے تبادلے میں پاک فوج کے سپاہی محمد طارق شہید ہوگئے جن کا تعلق سندھ کے ضلع بدین سے تھا۔
بیان میں کہا گیا کہ پاکستان کا امن مشن دستہ دنیا بھر کے مختلف حصوں میں پیشہ وارانہ لگن کے ساتھ خدمات انجام دیتا رہا ہے۔ اب تک دنیا بھر میں امن کی خاطر 181 پاکستانیوں نے جام شہادت نوش کیا ہے۔
آئی ایس پی آر کے مطابق پاکستان، بین الاقوامی برادری کے ذمہ دار رکن کی حیثیت سے اپنا کردار ادا کرہا ہے اور اقوام متحدہ کے تحت عالمی امن اور استحکام کے لیے اپنے فرائض نبھا رہا ہے۔
لائیو ٹی وی