طویل عرصے بعد ’برزخ ’ کا ٹیزر ریلیز
بھارتی اسٹریمنگ ویب سائٹ زی فائیو اور زندگی چینل کے لیے پاکستانی ہدایت کار عاصم عباسی کی جانب سے بنائی ویب سیریز ’برزخ ’ کا مختصر دورانیے کا ٹیزر جاری کردیا گیا۔
’برزخ ’ کو جہاں پاکستانی ہدایت کار نے ڈائریکٹ کیا ہے، وہیں اس کی زیادہ تر کاسٹ بھی پاکستانی اداکاروں پر مبنی ہے، تاہم اسے بھارتی اسٹریمنگ ویب سائٹ نے پروڈیوس کیا ہے۔
’برزخ ’ کو پہلے ہی 19 جولائی کو نشر کرنے کا اعلان کیا جا چکا ہے اور ٹیزر میں بھی اسے مقررہ تاریخ پر ریلیز کرنے کی تصدیق کرتے ہوئے پہلی جولائی کو اس کا ٹریلر جاری کرنے کا اعلان بھی کیا گیا۔
مختصر دورانیے کے ٹیزر سے کہانی کو سمجھنا مشکل ہے جب کہ اس میں ویب سیریز کے تمام کرداروں کو بھی نہیں دکھایا گیا لیکن مرکزی کرداروں صنم سعید اور فواد خان کی جھلکیاں دکھائی گئی ہیں۔
مختصر ٹیزر میں فواد خان اور صنم سعید سمیت دیگر کرداروں کو آئینے کے سامنے آنکھوں میں سرمہ ڈالتے ہوئے دکھایا گیا ہے۔
’برزخ ’ کی شوٹنگ دو سال قبل مارچ 2022 میں مکمل کی گئی تھی اور فروری 2023 میں اسے فرانسیسی فلم میلے میں پیش کیا گیا تھا۔
اب شوٹنگ مکمل ہونے کے ڈھائی سال بعد اسے آئندہ ماہ 19 جولائی کو ریلیز کرنے کا اعلان کرتے ہوئے اس کا ٹیزر ریلیز کیا گیا ہے۔
گزشتہ ہفتے ویب سیریز کے مختلف کرداروں کے پوسٹر بھی جاری کیے گئے تھے۔
’برزخ ’ کی کہانی ایک 76 سالہ شخص کی دوسری شادی اور اس کے خاندان کو شادی کی تقریب میں مدعو کیے جانے سمیت خاندان کے اندر ہونے والے مسائل کے گرد گھومتی ہے۔
سیریز کی عکس بندی پاکستان کے مقبول سیاحتی مقام ہنزہ اور اور کراچی شہر میں کی گئی ہے۔ اس کی کاسٹ میں فواد خان اور صنم سعید کے علاوہ ایمان سلیمان، فائزہ گیلانی، خوشحال خان، سلمان شاہد، انیقا ذوالفقار علی اور فرانکو گوئسٹ سمیت دیگر شامل ہیں۔
لائیو ٹی وی