پنجاب پولیس کو 5سال سے مطلوب اشتہاری سعودی عرب سے گرفتار
پنجاب پولیس کے اسپیشل آپریشنز سیل نے ایک اور کامیابی حاصل کرتے ہوئے قتل کے مقدمے میں مطلوب خطرناک اشتہاری قمر عباس 5 برس بعد سعودی عرب سے گرفتار کر لیا۔
ڈان نیوز کے مطابق پنجاب پولیس نے پانچ سال سے قتل کے مقدمے میں مطلوب اشتہاری ملزم کو گرفتار کر لیا۔
ترجمان پنجاب پولیس کے مطابق اشتہاری قمر عباس نے 2019 میں تھانہ پاہڑیانوالی کے علاقے میں فائرنگ کرکے خاتون کو قتل کر دیا تھا جس کی وجہ فریقین کے درمیان سابقہ مقدمات اور زمین پر قبضہ کا تنازع تھا۔
ترجمان نے بتایا کہ اشتہاری قمر عباس 5 برس سے منڈی بہاؤالدین پولیس کو مطلوب تھا اور اسپیشل آپریشن سیل نے انٹرپول سے ملزم قمر عباس کا ریڈ نوٹس جاری کروایا تھا۔
سعودی پولیس نے ملزم کو گرفتار کرکے لاہور ایئر پورٹ پر پنجاب پولیس کے حوالے کردیا جس کے بعد رواں سال بیرون ملک سے گرفتار خطرناک اشتہاریوں کی تعداد 82 ہو گئی ہے۔
آئی جی پنجاب ڈاکٹر عثمان انور نے آر پی او گوجرانوالہ اور ڈی پی او منڈی بہاؤالدین کو شاباش دیتے ہوئے کہا کہ قانونی کارروائی مکمل کر کے ملزم کو قرار واقعی سزا دلوائی جائے۔ انہوں نے ہدایت کی ایف آئی اے اور انٹرپول کی مدد سے دیگر خطرناک اشتہاریوں کو گرفتار کرکے وطن واپس لایا جائے۔ **
لائیو ٹی وی