اسلام آباد: وزیراعظم محمد نواز شریف نے کہا ہے کہ ہم پاکستان کو درپیش چیلنجز کو حل کرنے کے لیے یکسو ہیں اورمعاملات کو حل کرنےکے لیے مشاورت پر یقین رکھتے ہیں۔

انہوں نے یہ بات جمعرات کو پاکستان علماءکونسل کے چیئر مین علامہ طاہر اشرفی کی قیادت میں ایک دس رکنی وفد سے گفتگو کرتے ہوئے کہی ۔

انہوں نے کہا کہ دنیا میں پاکستان کا مثبت تاثر قائم کرنے کے لیے علماء کو اپنا کردار ادا کرنا ہوگا۔

وزیر اعظم نے کہا کہ شدت پسندی کا خاتمہ اسلام کی تعلیمات پر اس کی اصل روح کے ساتھ عمل کرنے میں مضمر ہے۔

نواز شریف نے علماء کو ملک میں امن اور ہم آہنگی کے فروغ کے لیئے کردار ادا کرنے پر حکومت کی مکمل حمایت کی یقین دہانی کرائی۔

پاکستان علماء کونسل کے چیئرمیں علامہ طاہر اشرفی نے پاکستان میں مختلف چیلنجوں پر قابو پانے کی وزیر اعظم کی کوششوں کو سراہا۔

انہوں نے کہا کہ نواز شریف کی ذاتی دلچسپی لینے سے طالبان کے ساتھ مذاکرات کے عمل میں پیش رفت ہوئی ہے۔

اس کے علاوہ اشرفی نے وزیر اعظم کو پاکستان علماء کونسل کی طرف سے مکمل حمایت کی یقین دہانی کرائی۔

علماء کونسل کے چیئرمیں نے حکومت کی خارجہ پالیسی اور ملک سے پولیو کے خاتمے کے لیئے اپنی حمایت کا بھی اظہار کیا۔