وزیر اعظم عمران خان ایک روزہ دورے پر لاہور پہنچ گئے۔

ریڈیو پاکستان کے مطابق لاہور میں وزیراعظم عمران خان صحت سہولت کارڈ کی تقسیم سے متعلق تقریب میں مہمان خصوصی ہوں گے۔

وزیر اعظم اپنے دورے کا آغاز پنجاب سیف سٹی اتھارٹی ہیڈ کوارٹر سے کیا جہاں انہیں منصوبے کے دائرہ کاراور منصوبے کے ذریعے سیکیورٹی کو موثر بنانے کے بارے میں بریفنگ دی گئی۔

اس موقع پر گورنر پنجاب چوہدری سرور، وزیر اعلی پنجاب عثمان بزدار اور ممبران صوبائی اسمبلی بھی موجود تھے۔

رپورٹ میں مزید بتایا گیا کہ عمران خان نے پولیس خدمت مرکز کے لیے پورٹل بھی لانچ کیا۔

صحت سہولت کارڈز کے تحت شہری بعض ہسپتالوں میں 70 لاکھ روپے تک کا طبی علاج حاصل کرسکتے ہیں۔

قبل ازیں عمران خان نے 26 جنوری کو لاہور کا دورہ کیا تھا اور انہوں نے وزیر اعلیٰ کے ساتھ سیکریٹریٹ میں ون آن ون ملاقات کی تھی۔