شیاؤمی کے ذیلی برانڈ پوکو نے ایک نیا سستا اسمارٹ فون متعارف کرا دیا ہے۔

پوکو سی 31 اس کمپنی کی سی سیریز کا دوسرا اسمارٹ فون ہے، اس سے قبل پوکو سی 3 اکتوبر 2020 میں متعارف کرایا گیا تھا۔

پوکو سی 31 میں میڈیا ٹیک کا ہیلیو جی 35 پراسیسر موجود ہے۔

فون میں 3 سے 4 جی بی ریم اور 32 سے 64 جی بی اسٹوریج موجود ہے جس میں مائیکرو ایس ڈی کارڈ سے مزید 512 جی بی اسٹوریج کا اضافہ کیا جاسکتا ہے۔

پوکو سی 31 میں اینڈرائیڈ 10 آپریٹنگ سسٹم موجود ہوگا اور پہلی بار کسی یوزر انٹرفیس کا اینڈرائیڈ سسٹم سے امتزاج نہیں کیا گیا۔

6.53 انچ کے ایچ ڈی پلس ڈسپلے میں 5 میگا پکسل سیلفی کیمرا واٹر ڈراپ نوچ میں چھپا ہوا ہے۔

فون کے بیک پر 3 کیمروں کا سیٹ اپ موجود ہے جس کا مین کیمرا 13 میگا پکسل کا ہے جس کے ساتھ 2 میگا پکسل میکرو اور 2 میگا پکسل ڈیپتھ کیمرے موجود ہیں۔

جہاں تک بیٹری کی بات ہے تو وہ 5000 ایم اے ایچ کی ہے اور کمپنی کے مطابق وہ آسانی سے 2 دن تک کام کرسکے گی۔

یہ فون 2 اکتوبر سے صارفین دستیاب ہوگا اورر اس کا 3 جی بی ریم اور 32 جی بی اسٹوریج والا ماڈل 115 ڈالرز (19 ہزار پاکستانی روپے سے زائد) جبکہ 4 جی بی ریم اور 64 جی بی اسٹوریج والا فون 130 ڈالرز (22 ہزار پاکستانی روپے سے زائد) میں دستیاب ہوگا۔