بھارت کے سابق عظیم بلے باز سنیل گواسکر نے آسٹریلیا میں ٹی20 ورلڈ کپ سے قبل بابر اعظم کو مشورہ دیتے ہوئے کہا ہے کہ صورت حال کے مطابق سے آپ کے شارٹس کی سلیکشن ہو تو کوئی مسئلہ ہی نہیں ہے۔

سنیل گواسکر کی آسٹریلیا میں ٹی 20 ورلڈ کپ کے موقع پر بابر اعظم سے ملاقات ہوئی، جس میں انہوں نے قومی ٹیم کے کپتان کو سالگرہ کی مبارک باد پیش کی اور اپنے قیمتی مشوروں سے نوازا۔

اس موقع پر قومی ٹیم کے ہیڈ کوچ ثقلین مشتاق، بیٹنگ کوچ محمد یوسف، نائب کپتان شاداب خان اور آل راؤنڈر محمد نواز بھی موجود تھے۔

سنیل گواسکر نے بابر اعظم کو کہا کہ اگر صورت حال کے مطابق آپ کی شارٹ سلیکشن ہو تو کوئی مسئلہ ہی نہیں ہے۔

انہوں نے محمد یوسف کی تعریف کی اور پوچھا کہ ابھی بھی آپ کا ٹیسٹ کرکٹ میں ایک سال میں سب سے زیادہ رنز بنانے کا ریکارڈ ہے، جس پر محمد یوسف نے جواب دیا، جی ہاں۔

بعد ازاں، سنیل گواسکر نے بابر اعظم کو کیپ پر آٹو گراف دیا۔