عید الاضحیٰ پر ریلیز کے لیے تیار رومانوی مزاحیہ فلم ’نابالغ افراد‘ کا مختصر ٹیزر جاری کردیا گیا، جسے دیکھ کر شائقین خوش دکھائی دیے۔

مختصر دورانیے کے ٹیزر میں صرف عاشر وجاہت اور ثمر جعفری کے کرداروں کو دکھایا گیا ہے اور اس سے فلم کی کہانی سمجھنا مشکل ہے۔

ٹیزر سے عندیہ ملتا ہے کہ دونوں اداکار فلم میں زمانہ طالب علمی کے دور میں بھی دکھائی دیں گے جب کہ وہ شہرت اور دولت حاصل کرنے کے الٹے سیدھے کام بھی کرتے دکھائی دیں گے۔

مزید کے لیے کلک کریں

ٹیزر میں دوسرے کرداروں کی جھلک نہیں دکھائی گئی، تاہم ٹیزر سے عندیہ ملتا ہے کہ اس کی شوٹنگ بھی زیادہ تر صوبہ سندھ کے دارالحکومت کراچی میں ہی کی گئی ہے۔

فلم کے ہدایت کار نبیل قریشی نے گزشتہ ماہ مئی کے اختتام پر انسٹاگرام پوسٹ میں بتایا تھا کہ ’نابالغ افراد‘ کو عید پر ریلیز کیا جائے گا اور اب عید میں 9 دن رہ جانے کے باوجود اس کا ٹریلر جاری نہیں کیا گیا۔

’نابالغ افراد‘ کو نبیل قریشی نے ازائم الفریزہ کے ساتھ مل کر پروڈیوس کیا ہے اور اسے اپنے ہی پروڈکشن ہاؤس فلم والا پکچر کے بینر تلے ریلیز کیا جائے گا۔

فلم کی کاسٹ میں عاشر وجاہت اور ثمر جعفری سمیت رمحہ احمد سمیت دیگر اداکار شامل ہیں۔

فلم کی نصف کاسٹ نئی نسل پر مبنی ہے، جن کی عمریں 15 سے 25 سال کے درمیان ہیں جب کہ نصف کاسٹ سینیئر اداکاروں پر مبنی ہے۔

فلم میں معراج سلیم، مانی، راشدہ تبسم اور فائزہ احسن سمیت دیگر اداکار بھی ایکشن میں دکھائی دیں گے۔