خیبرپختونخوا کے ضلع شمالی وزیرستان کے ایک گھر میں دھماکے سے 2 خواتین جاں بحق جب کہ 2 خواتین اور 3 بچے زخمی ہوگئے۔

ڈان نیوز کی رپورٹ کے مطابق شمالی وزیرستان کے گاؤں تپی میں گھر کے اندر دھماکے سے کمرے کی چھت گرگئی جس کے نتیجے میں جانی نقصان ہوا۔

پولیس نے بتایا کہ دھماکے سے 2 خواتین جاں بحق ہوئیں جب کہ 2 دیگر خواتین اور 3 بچے زخمی ہوئے، پولیس کے مطابق زخمیوں کو طبی امداد کی فراہمی کے لیے میرانشاہ ہسپتال منتقل کردیا گیا۔

پولیس حکام کا کہنا تھا کہ دھماکے کے حوالے سے تحقیقات شروع کردی گئی ہیں، فی الحال دھماکے کی نوعیت اور وجوہات معلوم نہیں ہو سکی ہیں۔