سابق سینیٹر خیبرپختونخوا اور ممتاز صنعتکار الیاس احمد بلور انتقال کرگئے، مرحوم کی نماز جنازہ کل بروز اتوار بوقت 2 بجے وزیر باغ میں ادا کی جائے گی۔

ڈان نیوز کے مطابق عوامی نیشنل پارٹی (اے این پی) کے سابق سینیٹر الیاس احمد بلور انتقال کرگئے، مرحوم اے این پی رہنما غلام بلور، شہید بشیر بلور اور عزیز بلور کے بھائی اور غضنفر بلور کے والد تھے۔

خاندانی ذرائع کے مطابق الیاس بلور گردوں کے عارضے میں مبتلا تھے اور اسلام اباد میں نجی ہسپتال میں زیر علاج تھے، گزشتہ شب ان کی حالت بگڑ گئی اور وہ خالق حقیقی سے جاملے۔

سابق سینیٹر الیاس احمد بلور نے عملی سیاست کا آغاز نیشنل پارٹی کی رکنیت سے کیا تھا، وہ قومی اسمبلی کے رکن اور سینیٹر بھی رہ چکے ہیں جب کہ سرحد چیمبر آف کامرس کے صدر اور مختلف چیمبرز کے اعلی منتخب عہدوں پر بھی رہے۔

وزیراعظم کا اظہار افسوس

وزیراعظم شہباز شریف نے سابق سینیٹر الیاس احمد بلور کے انتقال پر افسوس کا اظہار کرتے ہوئے مرحوم کے اہل خانہ کے لیے صبر و استقامت کی دعا کی۔

انہوں نے کہا کہ الیاس احمد بلور کی عوام کی فلاح و بہبود کے لیے ناقابل فراموش خدمات ہیں، مرحوم نے بطور سینیٹر عوام کی بہترین نمائندگی کی، مرحوم کی سیاسی خدمات یاد رکھی جائیں گی۔