کراچی کے علاقے گلشن اقبال میں ٹینکر نے 2 افراد کو کچل دیا، حادثے میں ایک شخص جاں بحق اور دوسرا زخمی ہوگیا، مشتعل افراد نے واٹر ٹینکر کو آگ لگادی۔

ڈان نیوز کے مطابق کراچی کے علاقے گلشن اقبال میں اتوار بازار کے قریب تیز رفتار ٹینکر نے 2 افراد کو روند ڈالا، واقعے میں ایک شخص جاں بحق اور دوسرا زخمی ہوگیا۔

واقعے کے بعد مشتعل افراد نے ٹینکر کو آگ لگادی، واقعے کا ذمے دار ڈرائیور موقع سے فرار ہونے میں کامیاب ہوگیا۔

قبل ازیں، آج صبح شہری میں مختلف ٹریفک حادثات میں 4 افراد جاں بحق ہوگئے تھے، ڈان نیوز کے مطابق سائٹ ایریا کی فیکٹری میں ٹرک کی ٹکر سے مزدور جاں بحق ہوگیا جس کی شناخت مزدور وقاص مجید کے نام سے ہوئی، پولیس نے واقعے میں ملوث ڈرائیور کو گرفتار کرلیا۔

مزید کے لیے کلک کریں

دریں اثنا، شاہراہ فیصل فاران ہوٹل کے قریب ٹریفک حادثے میں 2 افراد جاں بحق ہوگئے۔ عینی شاہدین کے مطابق حادثہ تیز رفتار گاڑی کی ٹکر سے پیش آیا، کار سوار کافی دور سے تیز رفتاری سے آرہا تھا اور موٹرسائیکل کو ٹکر مارنے کے بعد روندتا ہوا کافی دور تک لے گیا۔

عینی شاہدین کے مطابق حادثے کے بعد تیز رفتار کار کئی بار فٹ پاتھ سے ٹکرائی، موٹرسائیکل سوار بائکیا رائیڈر تھا جس کی شناخت 43 سالہ شکیل حیدر کے نام سے ہوئی، جبکہ دوسرے شخص کی شناخت نہیں ہوسکی، ضابطے کی کارروائی کے لیے لاشیں جناح ہسپتال منتقل کردی گئیں۔

دریں اثنا نمائش چورنگی کے قریب دو موٹر سائیکلوں میں تصادم ہوگیا، حادثے میں ایک نوجوان جاں بحق اور دوسرازخمی ہوگیا۔ ریسکیو ذرائع کے مطابق لاش اور زخمی کو ہسپتال منتقل کردیا گیا، جاں بحق شخص کی شناخت 24 سالہ رضا کے نام سے ہوئی۔