جوڈیشل کمیشن اجلاس میں سپریم کورٹ کے آئینی بینچ میں مزید 5 ججز کو شامل کرنے کی منظوری سے دی گئی، جس کے بعد آئینی بینچ میں کل ججز کی تعداد 13 ہوگئی۔

ڈان نیوز کے مطابق ذرائع نے بتایا کہ جسٹس ہاشم کاکڑ، جسٹس عامر فاروق، جسٹس شکیل احمد، جسٹس اشتیاق ابراہیم، جسٹس صلاح الدین پنہور آئینی بینچ کا حصہ بن گئے۔

ذرائع نے بتایا کہ آئینی بینچ میں مزید 5 ججز کو شامل کرنے کی منظوری اکثریت سے دی گئی، جسٹس منصور علی شاہ اور جسٹس منیب اختر اور جوڈیشل کمیشن میں پی ٹی آئی کے 2 ممبران علی ظفر اور بیرسٹر گوہر نے بھی مخالفت کی۔

ذرائع کا کہنا تھا کہ چاروں ممبران نے رائے دی سپریم کورٹ کے تمام ججز کو آئینی بینچ میں شامل کیا جائے۔

جوڈیشل کمیشن کے اجلاس میں سندھ ہائی کورٹ کے آئینی بینچ کے لیے تین مزید ججز نامزد کر دیے گئے۔

سندھ ہائیکورٹ کے آئینی بینچ میں جسٹس ریاضت سحر، جسٹس نثار احمد بھمبھرو اور جسٹس عبدالحامد شامل ہوں گے۔

جوڈیشل کمیشن اجلاسوں کا اعلامیہ جاری

بعد ازاں، جوڈیشل کمیشن آف پاکستان کے آج کے تین اجلاسوں کا اعلامیہ جاری کردیا گیا، جوڈیشل کمیشن نے لاہور ہائی کورٹ میں چار اضافی ججز کی تعیناتی اور سپریم کورٹ آئینی بینچ میں مزید پانچ ججز کی شمولیت کی بھی منظوری دی۔

اعلامیے کے مطابق جوڈیشل کمیشن کے پہلے اجلاس میں لاہور ہائی کورٹ میں اضافی ججز کی تعیناتی کا معاملہ زیر غور آیا، جوڈیشل کمیشن نے لاہور ہائی کورٹ میں اضافی ججز کے لیے 4 ناموں کی منظوری دی۔

ڈسٹرکٹ اینڈ سیشنز ججز راجا غضنفر علی خان، تنویر احمد شیخ، طارق محمود باجوہ اور عبہر گل خان کی لاہور ہائی کورٹ میں تعیناتی کی منظوری دی گئی۔

اعلامیے میں کہا گیا ہے کہ لاہور ہائی کورٹ میں اضافی ججز کی تعیناتی کی منظوری اکثریت رائے سے دی گئی۔

تین ججز کی سندھ ہائیکورٹ آئینی بینچ میں شمولیت کی منظوری

جوڈیشل کمیشن کے دوسرے اجلاس میں سندھ ہائی کورٹ آئینی بینچ میں ججز کی شمولیت کا معاملہ زیر غور آیا، جوڈیشل کمیشن نے تین ججز کی سندھ ہائی کورٹ آئینی بینچ میں شمولیت کی منظوری دی۔

اعلامیے کے مطابق جسٹس ریاضت علی سحر، جسٹس جسٹس عبد الحامد بھرگری، جسٹس نثار احمد بھمبھرو کی آئینی بینچ میں شمولیت کی منظوری دی گئی۔

سندھ ہائی کورٹ آئینی بینچ میں مزید ججز کی شمولیت کی منظوری بھی اکثریت رائے سے دی گئی۔

اعلامیے کے مطابق جوڈیشل کمیشن کے تیسرے اجلاس میں سپریم کورٹ آئینی بینچ میں ججز کی شمولیت کا معاملہ زیر غور آیا، جوڈیشل کمیشن نے سپریم کورٹ کے پانچ ججز کی آئینی بینچ میں شمولیت کی منظوری دی۔

جسٹس ہاشم کاکڑ، جسٹس صلاح الدین پنہور، جسٹس شکیل احمد، جسٹس عامر فاروق اور جسٹس اشتیاق اِبراہیم کی بھی آئینی بینچ میں شمولیت کی منظوری دی گئی۔

سپریم کورٹ آئینی بینچ میں ججز کی شمولیت کی منظوری اکثریت رائے سے دی گئی۔

چیف جسٹس نے سپریم کورٹ اور ہائی کورٹس میں ججز کی تعیناتی سے متعلق کرائٹیریا بنانے کیلئے کمیٹی کی تشکیل کا فیصلہ کیا، کمیٹی سپریم کورٹ اور ہائی کورٹس کے آئینی بینچز میں ججز کی شمولیت کیلئے بھی کرائٹیریا بنائے گی۔