حکومت اور ایشین بینک میں موٹروے معاہدہ
اسلام آباد: حکومت پاکستان اور ایشین ڈویلپمنٹ بینک (اے ڈی بی) کے درمیان نیشنل موٹروے ’ایم۔ فور‘ کی گوجرا سے شورکوٹ تک کے حصے کی تعمیر کا معاہدہ طے پاگیا۔
اقتصادی امور ڈویژن کے سیکریٹری محمد سلیم سیٹھی اور ایشین ڈویلپمنٹ بینک کے کنٹری ڈائریکٹر ورنر ای لیپیک کے درمیان اسلام آباد میں معاہدے پر دستخط ہوئے۔
اس موقع پر ڈی ایف آئی ڈی کے پاکستان میں گروپ ہیڈ لوئس واکر اور انجینئرنگ کوآرڈینیشن کے ممبر ارشد محمود چوہدری بھی موجود تھے۔
معاہدے کے تحت اے ڈی بی موٹروے کی تعمیر کے لیے پاکستان کو 17 کروڑ 80 لاکھ ڈالر فراہم کرے گا جس میں سے برطانیہ کے ڈیپارٹمنٹ فار انٹرنیشنل ڈویلپمنٹ (ڈی ایف آئی ڈی) کی جانب سے تقریباً 9 کروڑ ڈالر بطور گرانٹ دیے جائیں گے جبکہ حکومت پاکستان 4 کروڑ 60 لاکھ ڈالر کی سرمایہ کاری کرے گے۔
اٹھارہ سو کلو میٹر طویل موٹروے کی تعمیر سے وسطی پنجاب، کراچی اور گوادر پورٹس کا فاصلہ کم ہونے کے ساتھ ساتھ وسطی ایشیائی ممالک کے ساتھ پاکستان کے تجارتی کردار کو بڑھانے میں بھی مدد ملے گی۔
ایشین ڈویلپمنٹ بینک کے تعاون سے ہی موٹروے ’ایم۔ فور‘ کے فیصل آباد سے گوجرا تک کے سیکشن کی تعمیر حال ہی میں مکمل کی گئی ہے جس کے بعد اسے ٹریفک کے لیے کھول دیا گیا ہے۔
پاکستان میں شمال سے جنوب تک سڑکوں کا جعل بچھانے کے لیے اے ڈی بی اور ڈی ایف آئی ڈی مشترکہ طور پر تعاون کر رہے ہیں۔
موٹرویز کی تعمیر سے جہاں اقتصادی ترقی اور روزگار کے نئے مواقع پیدا ہورہے ہیں تو وہیں اس سے خطے میں رابطہ بحال کرنے میں بھی مدد مل رہی ہے۔
موٹروے ’ایم۔ فور‘ ملک میں ٹرانسپورٹ انفراسٹرکچر کو بہتر بنانے اور اسے جدید تقاضوں سے ہم آہنگ کرنے کے لیے کی جانے والی سرمایہ کاری کا اہم حصہ ہے جو نومبر 2019 تک مکمل ہوگا۔
اے ڈی بی کی جانب سے بیان میں کہا گیا ہے کہ موٹروے کی تعمیر سے فیصل آباد سے ملتان تک سفر کے اخراجات اور وقت کی بچت کے ساتھ ساتھ تجارت کو بہتر بنانے میں بھی مدد ملے گی۔
لائیو ٹی وی