کرکٹ ورلڈ کپ 2019 کی افتتاحی تقریب برطانیہ کے بکنگھم پیلس میں منعقد ہوئی جس میں شائقین کی بڑی تعداد نے شرکت کی۔

عالمی مقابلے کی افتتاحی تقریب کو 'اوپننگ پارٹی' کا نام دیا گیا تھا اور ملکہ برطانیہ نے تقریب کی صدارت کی۔

افتتاحی تقریب سے قبل ورلڈ کپ میں حصہ لینے والی تمام ٹیموں کے کپتانوں نے ملکہ برطانیہ ایلزبتھ سے ملاقات کی اور تصاویر بھی بنوائیں، جہاں پاکستان کے کپتان سرفراز احمد اپنے قومی لباس میں بکنگھم پیلس میں اس تقریب میں شریک ہوئے۔

اوپننگ پارٹی میں کرکٹ 60 سیکنڈز چیلنج میچ میں عالمی نوبیل انعام یافتہ پاکستانی طالبہ ملالہ یوسف زئی نے اظہر علی کے ہمراہ پاکستان کی نمائندگی کی۔

ویسٹ انڈیز نے سر ویوین رچرڈز کی قیادت میں 47 رنز بنائے، بھارت کی جانب سے انیل کمبلے اور بولی ووڈ اسٹار فرحان اختر نے نمائندگی کی اور 19 رنز بنائے۔

سری لنکا کی جانب سے مہیلا جے وردھنے اور بنگلہ دیش کی نمائندگی عبدالرزاق کے ہمراہ خاتون اداکارہ نے کی، آسٹریلیا نے بریٹ لی کی قیادت میں 69 رنز بنائے۔

جیمز فرینکلن نے نیوزی لینڈ کے لیے 32 رنز بنائے، کیلس نے جنوبی افریقہ کے لیے 48 رنز بنائے اور انگلینڈ نے کیون پیٹرسن کی قیادت میں 74 رنز بنائے۔

انگلینڈ نے 60 سیکنڈز چیلنج میچ میں آسٹریلیا کو پیچھے چھوڑتے ہوئے کامیابی حاصل کی۔

ورلڈ کپ کا آغاز آج (30 مئی) کو میزبان انگلینڈ اور جنوبی افریقہ کے درمیان میچ سے ہوگا جو اوول میں کھیلا جائے گا، جس کے بعد 31 مئی کو پاکستان اور ویسٹ انڈیز کی ٹیمیں آمنے سامنے ہوں گی۔