نوین وقار کا ڈراؤنی کہانی پر مبنی نیا ڈراما
پاکستان کی نامور اداکارہ نوین وقار آخری مرتبہ 'بے وفا' نامی ڈرامے میں کام کرتی نظر آئیں تھی اور اب انہوں نے ایک اور نیا ڈراما سائن کرلیا۔
اپنے اس ڈرامے میں وہ نہایت مختلف اور حیران کن کردار میں نظر آئیں گی۔
نوین وقار اپنے اس ڈرامے کے لیے بےحد پرجوش ہیں اداکارہ نے امید ظاہر کی ہے کہ عید کے موقع پر اسے نشر کیا جائے گا۔
ڈان امیجز سے بات کرتے ہوئے نوین وقار کا کہنا تھا کہ 'میں ماہ نور نامی لڑکی کا کردار نبھارہی ہوں، ڈراؤنی کہانی پر مبنی اس ڈرامے میں کئی سالوں کا دور دکھایا جائے گا، ابھی میں اس حوالے سے زیادہ کچھ نہیں بتا سکتی کیوں کہ یہ اپنے ابتدائی مراحل میں ہے'۔
ڈرامے کو شمعون عباسی نے ڈائیریکٹ کیا ہے اور یہ ہم ٹی وی پر نشر ہوگا۔
مزید پڑھیں: نوین وقار نے امیتابھ بچن کے ساتھ کام سے انکار کیوں کیا؟
خیال رہے کہ شمعون عباسی ایک دہائی بعد کسی ڈرامے کی ہدایات دینے جارہے ہیں۔
ڈرامے کی شوٹنگ کے حوالے سے نوین وقار کا کہنا تھا کہ 'اب تک کا تجربہ شاندار رہا ہے اور میں اس ڈرامے کے لیے بےحد پرجوش ہوں'۔
کاسٹ میں نوین وقار کے ساتھ ثمینہ احمد اور عدنان جعفر بھی موجود ہیں۔
اداکارہ نے یہ بھی انکشاف کیا کہ وہ اس ڈرامے کے ساتھ ساتھ دو اور ڈراموں کے اسکرپٹس پڑھ رہی ہیں تاہم ابھی انہوں نے فیصلہ نہیں کیا کہ وہ کس ڈرامے کا انتخاب کریں گی۔
لائیو ٹی وی