ڈیرہ غازی خان: فورٹ منرو کی سیر پر آئی امریکی خاتون کا گینگ ریپ
ضلع ڈیرہ غازی خان کے سیاحتی مقام فورٹ منرو میں امریکی شہری خاتون کا اس کے 'گائیڈ' اور اس کے دو ساتھیوں نے مبینہ طور پر گینگ ریپ کردیا۔
ڈان اخبار کی رپورٹ کے مطابق خاتون جو کہ ایک سوشل میڈیا ایکٹیوسٹ اور بلاگر بھی ہیں فورٹ منرو ہل اسٹیشن کی سیر پر آئی تھیں۔
خاتون کی شکایت پر کارروائی کرتے ہوئے بارڈر ملٹری پولیس (بی ایم پی) نے مرکزی ملزم 'ایم' (21) کو گرفتار کر لیا جو کہ امریکی شہری بھی ہے۔
یہ بھی پڑھیں: ٹرین گینگ ریپ: ملزمان کا موبائل فون سے ویڈیو بھی بنانے کا انکشاف
ڈی جی خان کے ڈسٹرکٹ پولیس آفیسر (ڈی پی او) علی وسیم نے ڈان کو بتایا کہ ملزم نے جرم کا اعتراف کر لیا ہے، انہوں نے بتایا کہ ملٹری پولیس نے ملزم کو مقامی عدالت میں پیش کر کے اس کا جسمانی ریمانڈ حاصل کیا جب کہ خاتون کو طبی معائنے کے لیے ہسپتال بھیج دیا گیا۔
انہوں نے کہا کہ فورٹ منرو بارڈر ملٹری پولیس نے بلاگر کی شکایت پر گینگ ریپ کا مقدمہ درج کیا، جس میں انہوں الزام لگایا کہ ملزمان نے اس واقعے کے ویڈیو کلپس بھی ریکارڈ کیے۔
ڈی پی او نے بتایا کہ غیر ملکی خاتون نے مرکزی ملزم سے سوشل میڈیا پر ٹورسٹ گائیڈز گروپ پیج کے ذریعے رابطہ کیا تھا اور اس کی دعوت پر فورٹ منرو کے دورے کا منصوبہ بنایا تھا، خاتون نے بعد میں پولیس کو فون پر مطلع کیا کہ اس کے میزبانوں نے اس کا ریپ کیا ہے۔
انکوائری کے دوران معلوم ہوا کہ خاتون پاکستان کے دورے پر تھی اور لاہور میں باسل خان کے ساتھ رہائش پذیر تھی اور باسل نے پولیس کو بتایا کہ وہ اس کی منگیتر ہے۔
مزید پڑھیں: جہلم میں حاملہ خاتون کے ساتھ ’گینگ ریپ‘
ڈی پی او نے بتایا کہ انکوائری رپورٹس کے مطابق باسل اور غیر ملکی بلاگر نے مرکزی ملزم ایم سے سوشل میڈیا ایپ کے ذریعے ملاقات کی تھی۔
خاتون نے پولیس کو بتایا کہ ایم کے بلانے پر وہ پبلک ٹرانسپورٹ پر اکیلے راجن پور روانہ ہوئی جہاں وہ اپنے میزبان کے اہل خانہ کے ساتھ بھی کچھ دن رہی۔
بعد ازاں 16 جولائی کو دونوں فورٹ منرو کے لیے روانہ ہوئے، جہاں وہ ایک ہوٹل کے کمرے میں ٹھہرے۔ خاتون نے بعد میں الزام لگایا کہ اس کے ساتھ 'ایم' اور اس کے ساتھیوں نے گینگ ریپ کیا ہے۔
خاتون نے ایف آئی آر میں کہا کہ مجھے پولیس کو معاملے کی اطلاع دینے پر 'ایم' کی جانب سے فون پر جان سے مارنےکی دھمکیاں ملی ہیں۔
فورٹ منرو بی ایم پی پولیس نے پاکستان پینل کوڈ کی دفعہ 376 اور 292 بی کے تحت تین نامزد ملزمان کے خلاف فرسٹ انفارمیشن رپورٹ (ایف آئی آر) درج کی۔
یہ بھی پڑھیں: کراچی: گینگ ریپ کا نشانہ بننے والی خاتون نے 2 ملزمان کی شناخت کرلی
ڈی جی خان کے ڈپٹی کمشنر انور بریار، جو بی ایم پی کے سینئر کمانڈنٹ بھی ہیں، نے ڈان کو بتایا کہ خاتون فورٹ منرو کے دورے پر تھی جہاں اس کے ساتھ مبینہ طور پر گینگ ریپ کیا گیا۔
انہوں نے کہا کہ دیگر نامزد ملزمان کی گرفتاری کے لیے چھاپے مارے جا رہے ہیں۔
دریں اثنا وزیراعلیٰ پنجاب حمزہ شہباز نے فورٹ منرو واقعے پر انسپکٹر جنرل آف پولیس (آئی جی پی) پنجاب سے رپورٹ طلب کر لی ہے۔
وزیراعلیٰ نے ملزمان کے خلاف بلاامتیاز کارروائی کا حکم دیتے ہوئے کہا کہ انہیں قانون کے مطابق مثالی سزا دی جائے گی اور شکایت کنندہ کے ساتھ انصاف کیا جائے گا۔
لائیو ٹی وی