برطانوی وزیر خارجہ کی بھارتی ہم منصب سے ملاقات، بی بی سی کے دفاتر پر چھاپوں کا معاملہ زیربحث
برطانوی وزیر خارجہ جیمز کلیورلی نے بھارتی ہم منصب کے ساتھ ملاقات کے دوران بھارت میں بی بی سی کے دفاتر کی تلاشی کا معاملہ اٹھایا۔
ڈان اخبار میں شائع خبررساں ادارے ’رائٹرز‘ کی رپورٹ کے مطابق بھارتی حکومت کے ذرائع نے بتایا کہ جیمز کلیورلی کے استفسار پر انہیں آگاہ کیا گیا کہ بھارت میں کام کرنے والے تمام اداروں کو متعلقہ قوانین و ضوابط کی مکمل تعمیل کرنی چاہیے’۔
گزشتہ ماہ بھارت کے ٹیکس حکام نے نئی دہلی اور ممبئی میں بی بی سی کے دفاتر کی 3 روز تک تلاشی لی جہاں انہوں نے کچھ سینیئر ملازمین کے ڈیجیٹل آلات سے ڈیٹا اکٹھا بھی کیا۔
گزشتہ روز جی 20 وزرائے خارجہ کے اجلاس سے قبل بھارتی وزیر خارجہ سبرامنیم جے شنکر کے ساتھ بات چیت کے بارے میں برطانوی وزیر خارجہ نے تفصیلات نہیں بتائیں۔
انہوں نے ایک انٹرویو کے دوران بتایا کہ ’میں نے ان کے ساتھ جو بات چیت کی ہے وہ ان تک رکھنا بہتر ہے، میں نے اس معاملے کو ان کے سامنے اٹھایا ہے‘۔
برطانوی وزیر خارجہ نے کہا کہ ’ڈاکٹر جے شنکر کے ساتھ اتنے مضبوط اور پیشہ ورانہ تعلقات رکھنے کا ایک فائدہ یہ ہے کہ میں اس قابل ہوں کہ میں نے ان کے ساتھ ان معاملات پر تبادلہ خیال کیا‘۔
انہوں نے کہا کہ ڈاکٹر جے شنکر نے بھی ان میں سے کچھ حساس مسائل پر میرے ساتھ گفتگو کی، تاہم زیادہ تر گفتگو مثبت دو طرفہ امور پر مرکوز رہی۔
لائیو ٹی وی