انڈر19 ورلڈ کپ: پاکستان نے افغانستان کو 181 رنز سے شکست دے دی
پاکستان نے انڈر19 ورلڈ کپ کے لیگ میچ میں شاہ زیب خان اور عبید شاہ کی عمدہ کارکردگی کی بدولت افغانستان کو یکطرفہ مقابلے کے بعد 181 رنز سے شکست دے دی۔
جنوبی افریقہ کے شہر ایسٹ لندن میں پاکستان نے ٹاس جیت کر پہلے بیٹنگ کا فیصلہ کیا جو درست ثابت ہوا اور پاکستان نے پہلے کھیلتے ہوئے 9 وکٹوں کے نقصان پر 284 رنز بنائے۔
پاکستان کی جانب سے شاہ زیب خان نے عمدہ بیٹنگ کرتے ہوئے 10 چوکوں اور 3 چھکوں کی مدد سے 106 رنز بنائے جبکہ کپتان سعد بیگ نے 4 چھکوں اور 3 چوکوں کی بدولت 55 رنز کی ناقابل شکست باری کھیلی۔
اس کے علاوہ ریاض اللہ نے بھی 46 رنز بنائے جبکہ افغانستان کی جانب سے خلیل احمد نے 4 وکٹیں لیں۔
ہدف کے تعاقب میں عبید شاہ اور ذیشان کی عمدہ باؤلنگ کے سبب افغانستان کی پوری ٹیم صرف 103 رنز پر ڈھیر ہو گئی، افغان بلے باز نعمان شاہ 26 رنز بنا کر سب سے نمایاں کھلاڑی رہے۔
پاکستان نے میچ میں 181 رنز سے کامیابی حاصل کی، عبید نے چار جبکہ ذیشان نے 3 وکٹیں لیں۔
شاہ زیب کو ان کی شاندار سنچری پر میچ کا بہترین کھلاڑی قرار دیا گیا۔
لائیو ٹی وی