مرتضٰی وہاب نے الیکشن کمیشن کے نوٹس کا جواب جمع کرا دیا
میئرکراچی بیرسٹر مرتضیٰ وہاب نے الیکشن کمیشن سے ملنے والے نوٹس کا جواب جمع کروا دیا۔
ڈان نیوز کے مطابق میئر کراچی نے جواب میں لکھا کہ قانون اور اداروں کاسب سے زیادہ احترام کرتاہوں، پریس کانفرنس کسی انتخابی مقاصدکے لیے نہیں تھی۔
ان کا کہنا تھا کہ الیکشن کمیشن کے ضابطہ اخلاق کی خلاف ورزی نہیں کی، الیکشن کمیشن کی ہدایات کے مطابق کسی امیدوارکی انتخابی مہم میں حصہ نہیں لیا۔
واضح رہے کہ گزشتہ روز الیکشن کمیشن نے میئر کراچی مرتضیٰ وہاب کی جانب سے انتخابی سرگرمیوں میں حصہ لینے کا نوٹس لیتے ہوئے وضاحت طلب کر لی تھی۔
الیکشن کمیشن کے ترجمان نے بتایا تھا کہ میئر، چیئرمین یا ناظم کسی سیاسی جماعت کو سپورٹ نہیں کر سکتے اور میئر کراچی ضابطہ اخلاق کی شق نمبر 18 اور 41 کی خلاف ورزی کے مرتکب ہوئے۔
انہوں نے کہا تھا کہ مرتضیٰ وہاب کو سیاسی جماعت کو سپورٹ کرنے پر نوٹس دیا گیا اور ان سے اس معاملے پر کل تک وضاحت طلب کر لی ہے۔
لائیو ٹی وی