ورلڈکپ کے 2 میچوں میں 2 ہیٹ ٹرک، پیٹ کمنز نے تاریخ رقم کردی
آسٹریلیا کے فاسٹ باولر پیٹ کمنز تاریخ رقم کرتے ہوئے 3 روز کے دوران ایک ٹی 20 ورلڈکپ میں 2 ہیٹ ٹرک کرنے والے دنیا کے پہلے اور مختصر ترین فارمیٹ میں 2 مرتبہ 3 گیندوں پر 3 وکٹیں لینے والے دنیا کے 5ویں باؤلر بن گئے۔
امریکا اور ویسٹ انڈیز میں جاری آئی سی سی ٹی 20 ورلڈ کپ 2024 کے سپر 8 مرحلے کے اہم میچ میں افغانستان نے کرکٹ کی تاریخ میں پہلی مرتبہ آسٹریلیا کو شکست دے دی۔
ویسٹ انڈیز کے کنگز ٹاؤن اسٹڈیم میں کھیلے گئے میچ میں افغانستان نے پہلے کھیلتے ہوئے مقررہ 20 اوورز میں 148 رنز بنائے جب کہ جواب میں آسٹریلیاکی پوری ٹیم127رنزبناکرآؤٹ ہوگئی، اس طرح سے اسے 21 رنز سے شکست کا سامنا کرنا پڑا۔
میچ میں کامیابی حاصل کرکے جہاں افغانستان نے تاریخ رقم کی، وہیں آسٹریلیا کے فاسٹ باؤلر پیٹ کمنز نے بھی منفرد ریکارڈ اپنے نام کرلیا۔
کھیلوں کی ویب سائٹ کرک انفو کی رپورٹ کے مطابق گزشتہ میچ میں بنگلہ دیش کے خلاف ہیٹ ٹرک کرنے کے بعد انہوں نے افغان ٹیم کے خلاف بھی شاندار باؤلنگ کی اور 18ویں اوور کی آخری گیند پر راشد خان کو آؤٹ کرنے کے بعد 20ویں اوور کی پہلی گیند پر کریم جنت کو پویلین کی راہ دکھائی اور اگلی ہی گیند پر گلبدین نائب کو بھی میدان بدر کردیا۔
افغانستان کے خلاف میچ میں وہ چار گیندوں پر چار وکٹیں حاصل کر سکتے تھے لیکن ڈیوڈ وارنر نے ڈیپ اسکوائر پر ایک کیچ چھوڑ دیا۔
4 گیندوں پر 4 وکٹیں لینے کا کارنامہ آئرلینڈ کے کرٹس کیمفر نے 2021 کے ٹی 20 ورلڈ کپ کے دوران انجام دیا تھا۔
سری لنکا کے لاستھ ملنگا، نیوزی لینڈ کے ٹم ساؤتھی، سربیا کے مارک پاولووچ، مالٹا کے وسیم عباس کے بعد پیٹ کمنز بھی ٹی 20 کرکٹ میں 2 مرتبہ ہیٹ ٹرک کرنے والے کھلاڑیوں میں شامل ہوگئے۔
پیٹ کمنز وسیم اکرم کے بعد لگاتار 2 میچوں میں 2 ہیٹ ٹرک کرنے والے دنیا کے دوسرے کھلاڑی بن گئے، پاکستانی اسٹار باؤلر نے مارچ 1999 میں سری لنکا کے خلاف لگاتار 2 ٹیسٹ میچوں میں 2 ہیٹ ٹرک کی تھیں۔
ان کے علاہ جمی میتھیوز نے 1912 میں جنوبی افریقہ کے خلاف ایک ٹیسٹ میچ کی دونوں اننگز میں ایک ہی دن 2 ہیٹ ٹرک کی تھیں۔
لائیو ٹی وی