’کے ٹو‘ سر کرنے کی کوشش کے دوران طبیعت ناساز، غیرملکی کوہ پیما ریسکیو
پاکستان آرمی نے دنیا کی دوسری سب سے بڑی چوٹی کے ٹو سر کرنے کی کوشش کے دوران خراب موسم کے باعث بیمار ہونے والے ہالینڈ، سنگاپور اور ایکواڈور سے تعلق رکھنے والے غیر ملکی کوہ پیماؤں کو ریسکیو کرلیا۔
ڈان نیوز کی رپورٹ کے مطابق کوہ پیماؤں کو مہم جوئی کے دوران صحت کی خرابی کے باعث ریسکیو کیا گیا، کوہ پیماؤں نے پاک آرمی کا شکریہ ادا کیا جنہوں نے بروقت ریسکیو کر کے ان کی جان بچائی۔
کوہ پیماؤں نے پاک فوج کا شکریہ ادا کرتے ہوئے بتایا کہ موسم کی خرابی کے باعث کے ٹو سر کرنے کے دوران طبیعت ناساز ہوگئی تھی، پاک فوج کے اہلکاروں کی بروقت کاروائی سے طبی امداد فراہم کی گئی اور ریسکیو کیا گیا، بروقت کاروائی پر ہم پاک فوج کا شکریہ ادا کرتے ہیں۔
یاد رہے کہ 10 جولائی کو دنیا کی 12ویں بلند ترین چوٹی براڈ پیک کو سر کرنے کی کوشش کے دوران طبیعت خراب ہونے پر پاکستانی کوہ پیما سلمہ مسعود اور ڈچ کوہ پیما ریمرہینس رچرڈ کو ریسکیو کرنے کے لیے گلگت بلتستان میں پاک فوج نے خصوصی آپریشن کیا تھا اور دونوں کوہ پیماؤں کو بحفاظت بذریعہ آرمی ہیلی کاپٹر اسکردو منتقل کر دیا گیا تھا۔
پاکستانی کوہ پیما سلمہ مسعود ایک روز قبل براڈ پیک چوٹی سر کرنے کے لیے روانہ ہوئی تھیں، مہم کے دوران طبیعت خراب ہونے پر انھوں نے طبی امداد فراہم کیے جانے کی درخواست کی۔
ان کے علاوہ ڈچ کوہ پیما کو دوران مہم سانس لینے میں دشواری سمیت دیگر وجوہات کی بنا پر طبی امداد کی ضرررت پیش آئی، انھوں نے پاک آرمی سے ایکویشن ریکوس کی۔
پاک فوج نے انخلا کی درخواست موصول ہونے کے بعد دونوں کوہ پیماؤں کو فوراً بزریعہ ہیلی کاپٹر ریسکیو کرلیا تھا۔
دونوں کوہ پیماؤں نے پاک آرمی کا شکریہ ادا کیا جنہوں نےفوری ایکشن لیتے ہوئے بروقت ریسکیو کیا تھا۔
رواں سال جنوری میں پاک فوج کے رضاکاروں نے ہمالیہ کی چوٹی پر پھنسے فرانسیسی کوہ پیما کی بھی جان بچائی تھی۔
لائیو ٹی وی