بنگلہ دیش نے ٹیسٹ کرکٹ میں پہلی بار پاکستان کو 2 میچوں کی سیریز میں کلین سوئپ کرکے تاریخ رقم کردی، پاکستان کو دوسری بار ہوم سیریز پر کلین سوئپ کا سامنا کرنا پڑا، انگلینڈ نے 2022 میں پاکستان کو 3 میچوں کی سیریز میں وائٹ واش کیا تھا۔

دوسرے ٹیسٹ کے آخری روز پاکستانی باؤلرز 185 رنز کے ہدف کے دفاع میں ناکام ر ہے اور مہمان ٹیم نے دوسرے ٹیسٹ میں 6 وکٹوں سے تاریخی فتح حاصل کرکے پاکستانی ٹیم کو وائٹ واش کردیا۔

اس سے قبل راولپنڈی میں ہی کھیلے گئے پہلے ٹیسٹ میچ میں بنگلہ دیش نے تاریخ میں پہلی بار پاکستانی ٹیم کو ٹیسٹ میچ میں شکست دی تھی، مہمان ٹیم نے پہلے ٹیسٹ کی دوسری اننگز میں پاکستانی ٹیم کو صرف 146 رنز پر آؤٹ کرکے 10 وکٹ سے تاریخی فتح حاصل کی تھی۔

پہلی اننگز میں 26 رنز پر 6 کھلاڑی آؤٹ ہونے کے بعد 138 رنز کی ذمہ دارانہ اننگز کھیلنے والے بنگلادیش کے وکٹ کیپر بلے باز لٹن داس کو میچ کا بہترین کھلاڑی قرار دیا گیا جب کہ سیریز میں 155 رنز اور 10 وکٹیں حاصل کرنے والے مہدی حسن میراز پلیئر آف دی سیریز قرار پائے۔

یاد رہے کہ پاکستان اور بنگلہ دیش کے درمیان دورے ٹیسٹ میچ کے پہلے دن کا کھیل بارش کی وجہ سے منسوخ ہوگیا تھا، دوسرے دن پاکستان پہلی اننگز میں 274 رنز پر آؤٹ ہوگئی تھی۔

جس کے جواب میں بنگلہ دیش کرکٹ ٹیم 262 رنز بنانے میں کامیاب رہی تھی اور پاکستان کو 12 رنز کی برتری ملی تھی لیکن دوسری اننگز میں قومی ٹیم صرف 172 رنز پر ڈھیر ہوگئی۔

گزشتہ روز دوسرے ٹیسٹ میچ میں چوتھے روز کا کھیل بارش کے باعث جلدی ختم کردیا گیا تھا۔

مہمان ٹیم کو جیت کیلئے 185 رنز کا ہدف ملا تھا جس کے تعاقب میں بنگلہ دیش نے بغیر کسی نقصان کے 42 رنز بنالیے تھے۔ پانچویں دن کھانے کے وقفے تک بنگلادیش نے 2 وکٹوں کے نقصان پر 122 رنز بنائے۔

کھانے کے وقفے تک کپتان نجم الحسن شانتو 33 اور مؤمن الحق 20 رنز بنا کر کریز پر موجود تھے، آؤٹ ہونے والے کھلاڑیوں میں اوپنر ذاکر حسن اور شادمان الاسلام شامل ہیں جو بالترتیب 40 اور 24 رنز بنا کر پویلین لوٹے۔

وفقے کے بعد کھیل کا آغاز ہوا تو کپتان اپنے انفرادی اسکور میں صرف 5 رنز کا اضافہ کرنے کے بعد 38 رنز پر آؤٹ ہوگئے، مؤمن الحق بنگلہ دیش آؤٹ ہونے والے چوتھے اور آخری کھلاڑی تھے جو 34 رنز بنا کر پویلین لوٹے۔

ان کے بعد آنے والے مشفق الرحیم 22 اور آل راؤنڈر شکیب الحسن 21 رنز بنا کر ناٹ آؤٹ رہے، اس طرح مہمان ٹیم نے دوسرے میچ میں پاکستان ٹیم کو 6 وکٹوں سے شکست دے کر سیریز 2صفر سے اپنے نام کرلی۔

پاکستان کی جانب سے میر حمزہ، خرم شہزاد ابرار احمد اور سلمان آغا نے ایک، ایک وکٹ حاصل کی۔

پاکستان کو ہوم گراونڈ پر ٹیسٹ میچ جیتے 1296 دن گزر گئے جب کہ پاکستان کو ہوم گراونڈ پر دوسری مرتبہ کلین سوئپ شکست کا سامنا کرنا پڑا ہے، اس سے قبل انگلینڈ نے پاکستان کو 2022 میں کلین سوئپ کیا تھا۔

واضح رہے کہ 25 اگست کو راولپنڈی میں کھیلے گئے 2 میچوں کی سیریز کے پہلے ٹیسٹ میں پاکستان کو 10 وکٹوں سے شکست دے کر بنگلہ دیش کی ٹیم نے تاریخ رقم کردی تھی جب کہ قومی ٹیم کی بنگال ٹائیگرز کے خلاف طویل دورانیے کی کرکٹ میں یہ پہلی شکست تھی۔

پاکستان پلیئنگ الیون

عبداللہ شفیق۔ صائم ایوب ۔ شان مسعود (کپتان) بابر اعظم ۔ سعود شکیل ( نائب کپتان) محمد رضوان ( وکٹ کیپر) سلمان علی آغا ۔ ابراراحمد ۔ میر حمزہ ۔ خرم شہزاد اور محمد علی۔

بنگلہ دیش پلیئنگ الیون

نجم الحسن شانتو (کپتان)، حسن محمود، لٹن داس، مہدی حسن میراز ، مومن الحق، مشفق الرحیم، ناہید رانا، شادمان اسلام، شکیب الحسن، ذاکر حسن اور تسکین احمد۔