حکومت کے پاس بل موجود ہی نہیں، بیرسٹر گوہر کا دعویٰ
پاکستان تحریک انصاف (پی ٹی آئی) کے چیئرمین بیرسٹر گوہر نے دعویٰ کیا ہے کہ اس وقت عدلیہ سے متعلق آئینی ترمیمی بل کسی کے پاس موجود نہیں ہے، یہاں تک کہ حکومت کے پاس بھی بل موجود نہیں۔
خورشید شاہ کی زیرصدارت قومی اسمبلی کی خصوصی کمیٹی کے اجلاس کے بعد صحافیوں سے غیررسمی گفتگو کرتے ہوئے چیئرمین پی ٹی آئی بیرسٹر گوہر کہا کہ کمیٹی میں جو بات ہوئی وہ تو نہیں بتا سکتے، وزیر قانوں نے ہمیں کچھ بریف کیا ہے، لیکن اس کمیٹی کا کوئی کام نہیں کہ اس بل پر بات کرے۔
انہوں نے کہا کہ کمیٹی میں ان کیمرہ گفتگو ہوئی، ہم نے صرف سنا ہے اور کوئی تجویز نہیں دی، رات کے اندھیرے کی ترامیم ہے جو رات کے اندھیرے میں ہو رہی ہے، حکومت نے آج بھی ہم سے بل شئیر نہیں کیا جب کہ حکومت نے یہ نہیں کہا کہ ووٹنگ آج کروانی ہے۔
ان کا کہنا تھا کہ ابھی اجلاس شروع ہونے والا ہے لیکن بل کسی کے پاس نہیں ہے، عدلیہ کو کمزور کرنے کی کو شش کی جارہی ہے، کل سپریم کورٹ نے بہت زبردست فیصلہ دیا ہے۔
چیئرمین پی ٹی آئی نے کہا کہ ہمارے ایم این ایز ہمارے ساتھ ہیں، صرف ہمارے دو اراکین اس وقت رابطے میں نہیں ہیں، ہمارے جن اراکین کے ساتھ رابطہ نہیں ان کے ووٹ اگر کاسٹ ہوتے ہیں تو وہ ہم نہیں مانتے۔
صحافی کی جانب سے سوال کیا گیا کہ کوئی آپ کے ووٹ توڑ رہا ہے جس پر انہوں نے کہا کہ انشااللہ ایسا نہیں ہوگا، ہمارے بندے قائم ودائم ہیں، اگر کوئی آزاد رکن ہے لیکن وہ کسی جماعت کا حمایت یافتہ ہے تو وہ اسی پارٹی کو ہی سپورٹ کرےگا۔
اس سے قبل پارلیمنٹ ہاوس کے باہر میڈیا سے گفتگو کے دوران صحافی نے سوال پوچھا کیا آپ نے اپنے اراکین کو ووٹ نہ دینے کی ہدایات جاری کی ہیں۔
بیرسٹر گوہر کا کہنا تھا کہ 2 ستمبر کو ہم نے اپنے ارکان پارلیمنٹ کو ہدایات جاری کر دی تھیں، ہم نے اپنی ہدایات کی کاپی کی مکمل فائل اسپیکر آفس میں بھی جمع کرائی ہے۔
لائیو ٹی وی