راولپنڈی ٹیسٹ کے لیے قومی ٹیم کا اعلان، ملتان ٹیسٹ کی فاتح الیون برقرار
پاکستان کرکٹ بورڈ کی سلیکشن کمیٹی نے انگلینڈ کے خلاف تیسرے ٹیسٹ میچ کے لیے ٹیم کا اعلان کردیا ہے اور ملتان میں میچ جیتنے والی فائنل الیون کو برقرار رکھا گیا ہے۔
پاکستان اور انگلینڈ کے درمیان سیریز کا تیسرا ٹیسٹ میچ کل سے کھیلا جائے گا اور میچ کے لیے سلیکشن کمیٹی نے پاکستان کی ٹیم کا اعلان کردیا ہے۔
سلیکشن کمیٹی نے انگلینڈ کے خلاف دوسرا میچ جیتنے والی ٹیم کو برقرار رکھا ہے اور ٹیم میں کسی قسم کی تبدیلی نہ کرتے ہوئے انگلینڈ کی طرح تین اسپنرز کو برقرار رکھا ہے۔
اس سے قبل یہ قیاس آرائیاں کی جا رہی تھیں کہ پاکستانی ٹیم ایک اسپنر زاہد محمود کو ڈراپ کر کے میچ میں عامر جمال کے ساتھ ساتھ ایک اور فاسٹ باؤلر کے ہمراہ اترے گی لیکن میچ کے لیے ٹیم کا اعلان کیا گیا تو اس میں کسی قسم کی تبدیلی نہ کی گئی۔
یہاں یہ بات بھی قابل ذکر ہے کہ گزشتہ ٹیسٹ میچ میں ٹیم کے تیسرے اسپنر زاہد محمود نے صرف 6 اوورز کیے تھے۔
یاد رہے کہ انگلینڈ نے بھی میچ کے لیے اعلان کردہ ٹیم میں تین اسپنرز کے ساتھ میدان میں اترنے کا فیصلہ کیا ہے۔
میچ کے لیے پاکستان کی ٹیم ان کھلاڑیوں پر مشتمل ہے۔
شان مسعود(کپتان)، صائم ایوب، عبداللہ شفیق، کامران غلا، سعود شکیل، محمد رضوان، سلمان علی آغا، عامر جمال، نعمان علی، ساجد خان اور زاہد محمود۔
واضح رہے کہ دونوں ٹیموں کے درمیان تین ٹیسٹ میچوں کی سیریز 1-1 سے برابر ہے۔
لائیو ٹی وی