خیبرپختونخوا میں ایک اور پولیو کیس کی تصدیق، ڈی آئی خان میں 2 سال کی بچی متاثر
خیبرپختونخوا میں پولیو کا ایک اور کیس سامنے آگیا، ضلع ڈیرہ اسماعیل خان میں نئے پولیو کیس کی تصدیق ہوئی ہے جس کے بعد صوبے میں پولیو کیسز کی تعداد 22 ہوگئی۔
ڈان نیوز کے مطابق ڈی آئی خان کی تحصیل درازیندہ کی یونین کونسل بہران میں 2 سال کی بچی میں وائرس کی تصدیق ہوئی، مذکورہ کیس گزشتہ سال دسمبر میں پولیو لیبارٹری کو ارسال کیا یا تھا۔ واضح رہے کہ 2024 کے دوران خیبرپختونخوا میں سامنے آنے والے پولیو کیسز کی تعداد 22 ہوگئی جبکہ ملک میں پولیو کیسز کی تعداد 72 ہوگئی۔
2 روز قبل قومی ادارہ صحت (این آئی ایچ) کی جانب سے جاری بیان میں سندھ کے ضلع جیکب آباد سے ایک بچے میں پولیو وائرس کی تصدیق کی گئی تھی ، جس کا نمونہ 27 دسمبر 2024 کو لیا گیا تھا، جس کے بعد 2024 میں وائلڈ پولیو وائرس ٹائپ (ون) کے کیسز کی تعداد 71 ہوگئی تھی۔
بیان میں مزید کہا گیا تھا کہ رواں برس کی پہلی انسداد پولیو مہم ملک بھر میں 3 فروری سے شروع ہوگی اور 9 فروری 2025 تک جاری رہے گی، والدین کے لیے یقینی بنانا بہت ضروری ہے کہ وہ اپنے 5 سال سے کم عمر کے تمام بچوں کو ویکسین لگوائیں۔
پولیو مفلوج کرنے والی بیماری ہے، جس کا کوئی علاج نہیں، پولیو کے قطروں کی متعدد خوراکیں اور 5 سال سے کم عمر کے تمام بچوں کے لیے معمول کے قطرے پلانے کے شیڈول کی تکمیل بچوں کو اس خوفناک بیماری کے خلاف اعلیٰ قوت مدافعت فراہم کرنے کے لیے ضروری ہے۔
واضح رہے کہ اس سے قبل قومی ادارہ صحت میں پولیو کے خاتمے کے لیے قائم ریجنل ریفرنس لیبارٹری نے کراچی کے ضلع شرقی سے ایک بچے میں وائلڈ پولیو وائرس ٹائپ ون کی تصدیق کی تھی، جس کے بعد گزشتہ سال کے کیسز کی تعداد 70 ہوگئی تھی۔
لائیو ٹی وی