کراچی: سہراب گوٹھ میں شادی کی تقریب میں ہوائی فائرنگ سے 12 سالہ بچی جاں بحق
کراچی کے علاقے سہراب گوٹھ میں شادی کی تقریب میں ہوائی فائرنگ سے 12 سالہ بچی جاں بحق ہوگئی، پولیس نے فوری کارروائی کرکے 2 ملزمان کو گرفتار کرلیا۔
ڈان نیوز کے مطابق سہراب گوٹھ میں شادی کی تقریب میں کچھ نوجوانوں کی جانب سے ہوائی فائرنگ کی گئی جس کے نتیجے میں 12 سالہ بچی جاں بحق ہوگئی۔
پولیس حکام کے مطابق مقتولہ عزیلہ عمارت کے چوتھی منزل پر موجود تھی، ایک گولی اس کے سینے میں لگی جو جان لیوا ثابت ہوئی۔
پولیس نے فوری کارروائی کرتے ہوئے موقع پر موجود 2 ملزمان کو حراست میں لے لیا، گرفتار ملزمان مقتولہ کے رشتے دار بتائے جاتے ہیں، پولیس نے مزید تحقیقات شروع کردی۔
واضح رہے کہ دو روز قبل بھی کراچی کے علاقے سرجانی ٹاؤن میں شادی کی تقریب کے دوران ہوائی فائرنگ سے 6 سالہ بچہ جاں بحق جب کہ ایک بچے سمیت 2 افراد زخمی ہو گئے تھے۔
سینئر سپرنٹنڈنٹ آف پولیس (ایس ایس پی) کراچی غربی طارق الٰہی مستوئی نے بتایا کہ تیسر ٹاؤن سیکٹر 35 سی میں شادی کی تقریب کے دوران کچھ افراد نے فائرنگ کی، جس کے نتیجے میں ایک بچہ جاں بحق ہوگیا جبکہ ایک دوسرا بچہ اور ایک آدمی زخمی ہوگیا۔
لائیو ٹی وی