کراچی: امریکی خاتون کا نوجوان کے گھر کے باہر دھرنا، واپسی کیلئے انوکھی فرمائش کر دی
کراچی کے نوجوان سے محبت میں مبینہ دھوکا کھانے والی امریکی خاتون اونیجا اینڈریو رابنسن نے شادی سے انکار پر پہلے ایئرپورٹ اور پھر لڑکے کے گھر کے پاس دھرنا دے دیا، خاتون نے امریکا واپسی کے لیے لڑکے سے ملاقات کے علاوہ بھری رقم کی ادائیگی کی انوکھی فرمائش بھی کردی۔
ڈان نیوز کے مطابق کراچی کے علاقے گارڈن ویسٹ کے رہائشی نوجوان 19 سالہ ندال احمد میمن کی محبت میں گرفتار 33 سالہ امریکی خاتون اونیجا اینڈریو رابنسن گزشتہ رات ایئرپورٹ سے نوجوان کے اپارٹمنٹ پہنچ گئی اور دھرنا دے دیا۔
امریکی خاتون اپارٹمنٹ کی پارکنگ میں کرسی ڈال کر بیٹھ گئی، رات سے کرسی پر بیٹھے بیٹھے خاتون کے پاؤں سوجھ گئے، اپارٹمنٹ کی یونین نے واپس جانے کا کہا لیکن خاتون نے انکار کر دیا، امریکی خاتون کی موجودگی کے باعث گارڈن کے مذکورہ اپارٹمنٹ میں لوگوں کو رش لگ گیا۔
دوسری جانب 19 سالہ نوجوان اور اس کے اہلخانہ گھر پر تالا ڈال کر کہیں چلے گئے ہیں جبکہ خاتون واپسی کے لیے لڑکے سے ملاقات اور ایک لاکھ ڈالر ادائیگی کا مطالبہ کر رہی ہے۔
امریکی خاتون نے صحافیوں سے گفتگو کرتے ہوئے کہا کہ اسے ایک لاکھ ڈالر ادا کیے جائیں، وہ دبئی منتقل ہوجائے گی اور اپنے بچوں کو بھی وہیں بلائے گی، خاتون نے متنبہ کیا کہ اگر رقم تسلسل سے نہ ملی تو وہ بار بار کراچی آئے گی۔
خاتون سے امریکا کے بجائے دبئی جانے کی وجہ پوچھی گئی تو اس کا کہنا تھا کہ امریکا میں بہت زیادہ آبادی ہے، وہ سکون چاہتی ہے اس لیے وہ اپنے بچوں کو لے کر دبئی جائے گی۔
خاتون نے دھوکا دینے والے نوجوان کے خلاف قانونی کارروائی کے سوال پر کہا کہ وہ کوئی قانونی کارروائی نہیں کرنا چاہتی، اسے گزر بسر کے لیے ایک لاکھ ڈالر چاہئیں، اگر پیسے ملتے رہے تو وہ اس کا احترام کرے گی۔
اس سے قبل گزشتہ روز خاتون کو وطن واپس بھیجنے کے لیے امریکی قونصل خانے کی دورکنی ٹیم کراچی ایئرپورٹ پہنچی تھی، ٹیم نے خاتون سے بات چیت کی تاکہ اسے امریکا بھیجنے پر آمادہ کیا جاسکے۔
تاہم خاتون امریکا واپس جانے سے مسلسل انکار کرتی رہی، امریکی قونصل خانے کی ٹیم کا کہنا تھا کہ خاتون کو واپس بھیجنے کے لیے زبردستی نہیں کرسکتے۔
قبل ازیں، امریکی خاتون کو قطر ایئر ویز کی پرواز کیو آر 611 سے صبح 10 بجےامریکا بھیجنے کی کوشش کی گئی تھی جس پر خاتون نے ایئرپورٹ پر شورشرابہ کیا جس کے بعد اسے پرواز سے آف لوڈ کردیا گیا۔
ایئرپورٹ حکام کا کہنا تھا کہ خاتون کسی صورت واپس جانے پر راضی نہیں ہورہی تھی جس سے پرواز 36 منٹ تاخیر کا شکار ہوئی تھی۔
لائیو ٹی وی