وزیراعظم سے ملاقات، بلاول بھٹو کی قیادت میں وفد کا حکومتی اقدامات پر اعتماد کا اظہار
وزیراعظم شہباز شریف سے پاکستان پیپلزپارٹی کے چیئرمین بلاول بھٹو زرداری نے ملاقات کی جس میں سیاسی امور پر تبادلہ خیال کیا گیا جب کہ شہباز شریف نے بلاول کو تحفظات دور کرنے کی یقین دہانی کروادی۔
ڈان نیوز کے مطابق وزیراعظم شہباز شریف نے بلاول بھٹو زرداری سمیت پیپلزپارٹی کے وفد کو افطار ڈنر پر مدعو کیا گیا۔
افطار ڈنر میں بلاول بھٹو زرداری کے ہمراہ چیئرمین سینیٹ یوسف رضا گیلانی، وزیراعلیٰ سندھ سید مراد علی شاہ، وزیراعلیٰ بلوچستان سرفراز بگٹی، گورنر خیبرپختونخوا فیصل کریم کنڈی، گورنر پنجاب سردار سلیم حیدر، راجا پرویز اشرف، خورشید شاہ، شیری رحمٰن اور نوید قمر نے شرکت کی۔
اس موقع پر بلاول بھٹو زرداری کی قیادت میں پیپلز پارٹی کے وفد نے وزیرِاعظم ہاؤس میں وزیرِاعظم شہباز شریف سے ملاقات کی جس میں سیاسی امور پر تبادلہ خیال کیا گیا جب کہ پنجاب میں پاور شیئرنگ کے معاملات پر بھی غور کیا گیا۔
بلاول بھٹو زرداری نے وزیراعظم کی قیادت میں حکومت پر مکمل اعتماد کا اظہار کیا جب کہ شہباز شریف نے پیپلزپارٹی کے تحفظات دور کرنے کی یقین دہانی کروائی۔
وزیراعظم ہاؤس سے جاری اعلامیہ کے مطابق وزیراعظم نے چاروں صوبوں میں عوامی امنگوں پر پورا اترنے اور وفاقی حکومت کے ساتھ تعاون سے عام آدمی کی زندگی بہتر بنانے کے لیے فعال اور متحرک کردار ادا کرنے پر پیپلز پارٹی کی قیادت کو سراہا۔
وزیراعظم نے کہا ہےکہ ملک کا مستقبل بہتر کرنے کے لیے وفاق اور صوبوں اور تمام سیاسی جماعتوں کو مل کر کام کرنا ہے۔
شرکاء نے وزیراعظم کی قیادت میں حکومت کی معاشی پالیسیوں اور ان کے نتیجے میں ملک میں حالیہ معاشی استحکام پر وزیرِ اعظم اور ان کی ٹیم کی انتھک کوششوں کو خراج تحسین پیش کیا۔
اعلامیہ میں کہا گیا کہ پاکستان پیپلز پارٹی نے وزیرِ اعظم کے حکومتی امور میں اتحادیوں سے مشاورت، ان کی رائے کے احترام اور ان کو اعتماد میں لینے کے اقدام پر وزیرِ اعظم کا شکریہ ادا کیا۔
پاکستان پیپلز پارٹی کے وفد نے وزیرِ اعظم کی قیادت میں ملکی معیشت کی ترقی کے لیے اپنے بھرپور تعاون کے عزم کا اعادہ کیا۔
لائیو ٹی وی