برطانوی عدالت کا یوٹیوبرعادل راجا کو ہتک عزت کیس میں قانونی اخراجات ادا کرنے کا حکم
لندن ہائی کورٹ نے برطانیہ میں مقیم یوٹیوبر کو حکم دیا ہے کہ پاکستانی فوج کے ریٹائرڈ افسر کی جانب سے خود پر دائر ہتک عزت کے مقدمے میں قانونی اخراجات ادا کرے۔
ڈان اخبار میں شائع خبر کے مطابق ماسٹر ڈیویسن کے سامنے ہونے والی آدھے دن کی سماعت کے بعد پاک فوج میں میجر کی حیثیت سے خدمات انجام دینے والے یوٹیوبر عادل راجا کو ریٹائرڈ بریگیڈیئر راشد نصیر کو قانونی اخراجات کی مد میں 6100 پاؤنڈ ادا کرنے کا حکم دیا گیا۔
6 ہفتوں میں ہونے والے مکمل ٹرائل سے قبل تین ابتدائی درخواستوں پر کارروائی کی گئی۔
عدالت نے عادل راجا کی جانب سے صحافی شاہین صہبائی، ریٹائرڈ کرنل اکبر حسین اور پی ٹی آئی کے سابق میشر احتساب مرزا شہزاد اکبر سمیت اپنے گواہوں کو دور دراز سے گواہی دینے کی اجازت دینے کی درخواست پر سماعت کی، جج نے اصولی طور پر اس درخواست کو منظور کر لیا، لیکن نوٹ کیا کہ امریکا میں دور دراز سے گواہی ایک معمول کا معاملہ ہے اور باضابطہ درخواست کی ضرورت پر سوال اٹھایا۔
دوسری درخواست میں ایک گمنام گواہ شامل تھا، جس کی گواہی عادل راجا نے پیش کرنے کا ارادہ کیا تھا لیکن بعد میں واپس لے لیا، اگرچہ راشد نصیر کو نام ظاہر نہ کرنے کے اصول پر کوئی اعتراض نہیں تھا لیکن جج نے فوری طور پر اخراجات کا حکم دینے سے انکار کرتے ہوئے معاملے کا فیصلہ ٹرائل کے اختتام پر چھوڑ دیا۔
تیسری درخواست راشد نصیر کی جانب سے دائر کی گئی تھی، جس میں عادل راجا کی جانب سے عدالتی فیصلے سے ادائیگیوں میں تاخیر کے بعد اخراجات کا حکم دینے کی استدعا کی گئی تھی، عادل راجا کی قانونی ٹیم نے دلیل دی کہ پہلے ہی ادائیگیاں کی جا چکی ہیں، عدالت نے راشد نصیر کے حق میں فیصلہ سناتے ہوئے راجا کو 14 دن کے اندر 6100 پاؤنڈ ادا کرنے کا حکم دیا۔
سماعت کے بعد عادل راجا نے نتائج کو ’دو سے ایک کی‘ جیت قرار دیتے ہوئے جج کے اس فیصلے پر روشنی ڈالی کہ وہ دور دراز گواہی کی اجازت دیتے ہیں اور واپس لیے گئے گواہ پر لاگت کے فیصلے مؤخر کرتے ہیں، حالانکہ تیسرے معاملے پر اخراجات ادا کرنے کے حکم کو تسلیم کرتے ہیں۔
راجا کی جانب سے اپنے آن لائن پلیٹ فارم پر لگائے گئے الزامات پر مبنی یہ کیس جولائی کے آخر میں مکمل سماعت کے لیے پیش کیا جائے گا۔
لائیو ٹی وی