پیپلز پارٹی بجٹ سے پہلے کینالز کا منصوبہ مسترد کروائے گی، وزیراعلیٰ سندھ
وزیراعلیٰ سندھ مراد علی شاہ نے کہا ہے کہ پاکستان پیپلز پارٹی ( پی پی پی) بجٹ سے پہلے دریائے سندھ سے نہریں نکالنے کا منصوبہ مسترد کروائے گی۔
ڈان نیوز کے مطابق بھان سعید آباد میں میڈیا سے گفتگو کرتے ہوئے وزیراعلیٰ سندھ نے کہا کہ چیئرمین پیپلز پارٹی بلاول بھٹو زرداری اور صدر آصف زرداری کبھی بھی سندھ دشمن کینالز منصوبے کو آگے بڑھنے نہیں دیں گے۔
وزیراعلیٰ سندھ کا کہنا تھا کہ منصوبے پر سروے کروایا گیا تھا، اس پر کام بند ہوچکا ہے۔
انہوں نے کہا کہ کینالز کے مسئلے پر احتجاج کرنا سب کا حق ہے، سندھ حکومت احتجاج کو نہیں روکے گی۔
یاد رہے کہ 4 اپریل کو سکھر میں میڈیا سے گفتگو کے دوران وزیراعلیٰ سندھ نے کہا تھا کہ کینالز کے مسئلے پر پیپلزپارٹی کے خلاف پروپیگنڈا کیا جارہا ہے، ہم کینال کے خلاف کھڑے ہیں، آئین کہتا ہے صوبوں کے اتفاق تک پانی کامنصوبہ نہیں بن سکتا، انہوں نے واضح کیا کہ کوئی منصوبہ بنانےکی سوچ پرتوپابندی نہیں لگائی جاسکتی۔
مراد علی شاہ نے کہا تھا کہ جولائی کے منٹس آئے اور پروپیگنڈا کیا گیا کہ صدر مملکت نے منظوری دے دی، کچھ لوگ پروپیگنڈا کرنے میں بہت تیز ہیں، صدر مملکت نے پارلیمنٹ میں کہا ان منصوبوں کی حمایت نہیں کرسکتا، صدر مملکت نے اس معاملے پر کسی سمری پر دستخط نہیں کیے۔
لائیو ٹی وی