مصباح الحق انجری کا شکار، پلے آف میں شرکت مشکوک
پاکستان سپر لیگ کے تیسرے ایڈیشن کے پلے آف سے قبل اسلام آباد یونائیٹڈ کو بڑا دھچکا لگا ہے اور کپتان مصباح الحق کی کلائی میں فریکچر کے سبب ان کی میچ میں شرکت مشکوک ہو گئی ہے۔
پاکستان سپر لیگ 2018 کے آخری لیگ میچ میں کراچی کنگز کے ٹائمل ملز کی گیند لگنے سے مصباح الحق کلائی کی انجری کا شکار ہوئے اور ذرائع کے مطابق ان کی کلائی میں فریکچر ہو گیا ہے جس کے سبب وہ شاید اگلے چار ہفتوں تک کرکٹ نہ کھیل سکیں۔
اگر مصباح الحق انجری کے سبب میچ میں شرکت نہیں کرتے تو ان کی جگہ جین پال ڈومینی ٹیم کی قیادت کریں گے۔
یاد رہے کہ پورے ٹورنامنٹ میں اسلام آباد یونائیٹڈ انجری مسائل سے دوچار رہی ہے اور ٹیم کے نائب کپتان رومان رئیس بھی انجری کے سبب ایونٹ سے باہر ہو کر وطن واپس لوٹ چکے ہیں جبکہ آندے رسل بھی انجری کے سبب ٹورنامنٹ سے باہر ہو چکے ہیں۔
یہاں یہ بات بھی قابل ذکر ہے کہ کراچی کنگز کے کپتان عماد وسیم بھی انجری کی وجہ سے میچ نہیں کھیل سکیں گے اور مایہ ناز آل راؤنڈر شاہد آفریدی کی بھی میچ میں شرکت مشکوک نظر آتی ہے۔
آج اسلام آباد یونائیٹڈ اور کراچی کنگز کے درمیان ایونٹ کا پہلا پلے آف کھیلا جائے گا اور فاتح ٹیم 25 مارچ کو کراچی کے نیشنل اسٹیڈیم میں کھیلے جانے والے فائنل کیلئے کوالیفائی کر لے گی۔
میچ کی شکست خوردہ ٹیم کو فائنل میں پہنچنے کا ایک اور موقع بھی ملے گا اور وہ کوئٹہ گلیڈی ایٹرز اور پشاور زلمی کے درمیان کھیلے جانے والے پہلے ایلیمنیٹر کی فاتح سے لاہور میں ٹکرائے گی۔
لائیو ٹی وی