بیرون ملک مقیم پاکستانیوں کے لیے بینکاری کی سہولت فراہم کرنے والے روشن ڈیجیٹل اکاؤنٹ (آر ڈی اے) کے ذریعے ترسیلات زر 9 ارب 56 کروڑ ڈالر تک پہنچ گئیں، جن میں سے زیادہ تر مقامی طور پر استعمال کی گئیں۔

ڈان اخبار میں شائع خبر کے مطابق اسٹیٹ بینک کی تازہ ترین اپ ڈیٹ میں کہا گیا ہے کہ 31 جنوری تک آر ڈی اے کی مجموعی آمد 9 ارب 56 کروڑ ڈالر سے زائد ہوگئی ہے۔

موصول ہونے والے مجموعی ڈپازٹس میں سے 1 ارب 71 کروڑ ڈالر سے زائد واپس بھیجے جا چکے ہیں، جب کہ 6 ارب ڈالر سے زائد مقامی طور پر استعمال ہوئے ہیں۔

اسی کے ساتھ خالص قرض ایک ارب 80 کروڑ ڈالر پر برقرار رہا۔

پاکستان نے 2020 میں آر ڈی اے کا آغاز کورونا وائرس کے پھیلاؤ کے سبب ٹریژری بلز اور پاکستان انویسٹمنٹ بانڈز (پی آئی بیز) سے 4 ارب ڈالر سے زائد کے اخراج کے بعد کیا تھا۔

تاہم، یہ مقامی بانڈز میں ابتدائی سرمایہ کاری کی جگہ نہیں لے سکا اور اس میں ترسیلات زر کی آمد کا حجم کم رہا۔

بینکرز اور ماہرین کا خیال ہے کہ بیرون ملک مقیم پاکستانی جو ریاست کی حمایت یافتہ سیکیورٹیز کی مختلف کیٹیگریز میں سرمایہ کاری کر رہے ہیں، انہیں اعتماد کی کمی کا سامنا ہے، کیوں کہ حکومت معاشی استحکام لانے کے لیے گزشتہ 3 سال سے جاری سیاسی غیر یقینی کی صورتحال کا خاتمہ نہیں کر سکی۔

پاکستان کو ڈالر کی ضرورت آر ڈی اے کے ذریعے آنے والی آمد سے کہیں زیادہ ہے، ریکارڈ ترسیلات زر کے باوجود غیر ملکی قرضوں کی ادائیگی اب بھی سب سے بڑا مسئلہ ہے۔

مارکیٹ ذرائع کا کہنا ہے کہ صدر زرداری کے حالیہ دورہ چین کا بنیادی مقصد قرضوں کا رول اوور یقینی بنانا تھا۔

تاہم مارکیٹ ذرائع کا کہنا ہے کہ جون 2025 کے اختتام تک چین کے تقریباً 9 ارب ڈالر کے قرضے پختہ ہو جائیں گے، ملکی ذخائر اس قرض کی ادائیگی کے لیے ناکافی ہیں، اور اسٹیٹ بینک کے موجودہ فاریکس ہولڈنگز کا جزوی استعمال بھی شرح تبادلہ کو غیر مستحکم کر سکتا ہے۔

’بائی بیک‘ کے نظر ثانی شدہ قواعد

اسٹیٹ بینک آف پاکستان (ایس بی پی) نے سرکاری سیکیورٹیز کے بائی بیک کے لیے نظر ثانی شدہ قواعد جاری کر دیے ہیں، جو سابقہ ہدایات کی جگہ لیں گے۔

نئے سرکلر کے مطابق اسٹیٹ بینک حکومت پاکستان کی جانب سے ایم ٹی بیز اور پی آئی بیز (زیرو کوپن، فکسڈ اور فلوٹر) سمیت سرکاری سیکیورٹیز کی ’بائی بیک کے لیے نیلامی کرے گا۔

سرکلر میں کہا گیا ہے کہ ’اسٹیٹ بینک سرکاری سیکیورٹیز کی خریداری کے لیے نیلامی کے نتائج، سیکیورٹی اور ہدف کی رقم، نیلامی کے شیڈول اور سرکاری سیکیورٹیز جیسی تفصیلات کا اعلان ریفائنٹیو، بلومبرگ اور اسٹیٹ بینک کی ویب سائٹ پرکرے گا۔‘