چارسدہ: مردہ مرغیوں سے بھری گاڑی کی پولیس اہلکار کو ٹکر، ملزمان گرفتار
صوبہ خیبر پختونخوا میں چارسدہ کی تحصیل تنگی کی انتظامیہ نے مردہ مرغیوں سے بھری گاڑی پکڑلی، گاڑی کو روکنے پر ملزمان نے گاڑی پولیس پر چڑھا دی، جس کے باعث ایک اہلکار زخمی ہوگیا۔
ڈان نیوز کے مطابق تحصیل تنگی کی انتظامیہ نے مرغیاں لے جانے والی ایک مشتبہ گاڑی کو روکا تو ڈرائیور نے رفتار تیز کرتے ہوئے گاڑی کو پولیس اہلکار پر چڑھا دیا، اس دوران ایک پولیس اہلکار زخمی ہوگیا، جسے ہسپتال منتقل کر دیا گیا۔
پولیس اہلکار کے زخمی ہونے کے بعد انتظامیہ نے گاڑی کو پکر کر تحویل میں لے لیا، اس دوران گاڑی کی تلاشی لی گئی تو گاڑی سے سیکڑوں مردہ مرغیاں ملیں۔
اسسٹنٹ کمشنر (اے سی) وقاص الرحمٰن نے بتایا کہ تحصیل انتظامیہ تنگی نے مردہ مرغیوں سے بھری گاڑی پکڑنے کے بعد 400 سے زائد مردہ مرغیاں تلف کردی ہیں، ان مردہ مرغیوں کو ضلع بھر کے ہوٹلوں پر سپلائی کیا جانا تھا، گرفتار کیے گئے ملزمان سے پولیس حکام تفتیش کر رہے ہیں۔
انہوں نے بتایا کہ مردہ مرغیوں سے بھری گاڑی روکنے کے دوران ملزمان کی جانب سے گاڑی کو پولیس اہلکار پر چڑھانے کی کوشش کی گئی، جس سے اہلکار زخمی ہوگیا تھا، تاہم پولیس اہلکار کو طبی امداد کے لیے ہسپتال منتقل کیا گیا تھا، جس کی حالت بہتر ہے۔
لائیو ٹی وی