رمضان کا چاند نظر نہیں آیا، پہلا روزہ 2 مارچ بروز اتوار ہو گا
چیئرمین مرکزی رویت ہلال کمیٹی مولانا عبدالخبیر آزاد نے اعلان کیا ہے کہ ملک بھر میں چاند نظر آنے کی کوئی شہادت موصول نہیں ہوئی، لہٰذا ملک میں پہلا روزہ 2 مارچ بروز اتوار ہوگا۔
اجلاس کے بعد چیئرمین مرکزی رویت ہلال کمیٹی مولانا عبدالخبیر آزاد نے پریس کانفرنس کرتے ہوئے اعلان کیا کہ آج ماہ رمضان المبارک 1446 ھ کے چاند کی رویت کا شرعی فیصلہ کرنے کے لیے مرکزی رویت ہلال کمیٹی پاکستان کا اجلاس دفتر ایڈمنسٹریٹر اوقاف پشاور میں منعقد ہوا۔
ان کا کہنا تھا کہ علامہ ڈاکٹر راغب حسین نعیمی، مولانا حافظ عبدالغفور، مولانا یسیٰن ظفر، مفتی علی اصغر ابدالی، مفتی یوسف کشمیری، مفتی فیصل احمد، قاری عبدالرؤف مدنی، حافظ عبدالمالک بروہی، مولانا اشرف علی، مفتی قاری مہر اللہ، صاحبزادہ سید حبیب اللہ چشتی، مفتی ضمیر احمد ساجد، مولانا سردار محمد خان لغاری، مولانا اسد ذکریا قاسمی شریک ہوئے۔
اس کے علاوہ زونل رویت ہلال کمیٹی پشاور کے اراکین بھی شریک ہوئے، مولانا عبدالخبیر آزاد نے کہا کہ پاکستان کے بیشتر مقامات پر مطلع ابر آلود رہا، کچھ مقامات پر مطلع صاف بھی رہا۔
انہوں نے کہا کہ پاکستان کے کسی بھی مقام سے ماہ رمضان المبارک کا چاند نظر آنے کی کوئی شہادت کوئی موصول نہیں ہوئی، لہٰذا اتفاق رائے سے فیصلہ کیا گیا کہ انشا اللہ یکم رمضان المبارک 1446 ھ 2 مارچ 2025 بروز اتوار کو ہوگی۔
قبل ازیں، ڈان نیوز نے رپورٹ کیا کہ مرکزی چیئرمین عبدالخبیر آزاد کی زیر صدارت رویت ہلال کمیٹی کا اجلاس ہوا، پورے پاکستان سے 19 رکنی مرکزی اور 6 زونل کمیٹی کے ممبران شریک ہوئے۔
کمیٹی ممبر نے بتایا تھا کہ مفتی پوپلزئی کے ساتھ بھی رابطے میں ہیں، شہادتوں کا جائزہ لیا جائے گا، محکمہ موسمیات کے مطابق چاند نظر آنے کے امکانات کہیں پر بھی نہیں ہیں۔
رمضان المبارک کا چاند دیکھنے کے لیے پنجاب کے دارالحکومت لاہور میں بھی زونل رویت ہلال کمیٹی کا اجلاس ہوا۔
ڈان نیوز کے مطابق لاہور میں کالی گھٹائیں چھا گئیں ،آسمان پر گہرے بادل ہیں اور ٹھنڈی ہوائیں چل رہی ہیں۔
لاہور میں ایوان اوقاف میں زونل رویت ہلال کمیٹی کا اجلاس شروع ڈی جی اوقاف خالد محمود کی زیر صدارت شروع ہوا۔
ڈی جی اوقاف خالد محمود سندھو کا کہنا تھا کہ لاہور میں رمضان المبارک کا چاند نظر نہیں آیا، چاند نظر آنے یا نا نظر آنے کا حتمی اعلان مرکزی رویت ہلال کمیٹی کرے گی۔
کوئٹہ میں بھی زونل رویت ہلال کمیٹی کا اجلاس منعقد ہوا، جہاں کمیٹی نے اعلان کیا کہ بلوچستان کے کسی علاقے سے چاند نظر آنے کی شہادت نہیں ملی۔
مولانا انوار الحق حقانی کا کہنا تھا کہ کوئٹہ سمیت بلوچستان کے کسی بھی علاقے میں رمضان المبارک کا چاند نظر نہیں آیا، بلوچستان کے ساحلی علاقوں میں مطلع آبر آلود تھا، مرکزی رویت ہلال کمیٹی کو بلوچستان کے صورتحال سے آگاہ کردیا۔
اسی طرح اسلام آباد میں زونل رویت ہلال کمیٹی کے ارکان وزارت مذہبی امور کی چھت پر چاند دیکھنے کے لیے موجود رہے۔
کمیٹی کے شرکاء علامہ سجاد حسین نقوی، مفتی عبدالسلام جلالی اور مفتی محمد اقبال نعیمی، علامہ ہارون الرشید بالاکوٹی، پیر محمد ممتاز احمد ضیا نظامی بھی شریک ہوئے۔
اسلام آباد میں بھی زونل کمیٹی نے رمضان المبارک کا چاند نظر نہ آنے سے متعلق مرکزی رویت ہلال کمیٹی کو آگاہ کردیا، چاند نظر آنے یا آنے سے متعلق اعلان مرکزی رویت ہلال کمیٹی کرے گی۔
ذرائع محکمہ موسمیات نے بتایا کہ اسلام آباد میں مطلع ابر آلود ہونے کے سبب چاند نظر آنے کا امکان نہیں۔
ماہرین کے مطابق رمضان المبارک کا چاند جمعہ کو صبح 5 بج کر 45 منٹ پر پیدا ہوا، غروبِ آفتاب کے وقت چاند کی عمر زیادہ سے زیادہ 14 گھنٹوں سے کم ہوگی۔
ماہرین کا کہنا تھا کہ رویت ہلال کے لیے چاند کی 19 گھنٹوں سے زائد ہونی چاہیے، چاند کا سورج سے زاویائی فاصلہ جو کم از کم 10 ڈگری وہ آج 5 ڈگری ہے۔
ماہرین کے مطابق غروبِ شمس اور غروبِ قمر کے درمیان فرق کم از کم 40 منٹ ہونا چاہیے، فرق کوئٹہ اور جیوانی میں 30 منٹ جبکہ پاکستان کے دیگر تمام علاقوں میں 29 منٹ ہو گا۔
ماہرین نے بتایا کہ لاہور میں غروب آفتاب کا وقت 6 بجے ہے، لاہور میں چاند نظر آنے کا وقت 6 بجکر 32 منٹ ہے جبکہ پنجاب میں چاند نظر آنے کا وقت 6 بجکر 47 منٹ تک ہوگا۔
لائیو ٹی وی