پہلا یورپی یونین-پاکستان بزنس فورم 14 تا 15 مئی کو منعقد ہوگا
اقتصادی تعاون بڑھانے کے لیے پہلا یورپی یونین-پاکستان بزنس فورم 14تا 15 مئی کو اسلام آباد میں منعقد کیا جارہا ہے۔
حکومت اور یورپی یونین کے وفد کی جانب سے منگل کو جاری ہونے والے ایک مشترکہ اعلامیہ کے مطابق یورپی یونین دنیا کی واحد سب سے بڑی اور پاکستانی مصنوعات کی بھی سب سے بڑی برآمدی مارکیٹ ہے۔ یورپی یونین دنیا کی سب سے بڑی غیر ملکی سرمایہ کار بھی ہے جس کا عالمی سطح پر براہ راست غیر ملکی سرمایہ کاری میں حصہ 42 فیصد ہے۔
اس ماہ کے اوائل میں، وزیر اعظم شہباز شریف نے یورپی یونین کے ساتھ اپنی تعاون پر مبنی شراکت داری کو مزید مضبوط کرنے کی پاکستان کی خواہش کا اعادہ کرتے ہوئے بزنس فورم کے انعقاد کا خیرمقدم کیا تھا۔
حکومتی اور یورپی یونین کے مشترکہ اعلامیہ میں کہا گیا ہے کہ ’ 240 ملین سے زیادہ لوگوں کی تیزی سے بڑھتی ہوئی مارکیٹ، مسابقتی لیبر لاگت، وسطی اور جنوبی ایشیا تک اسٹریٹجک جغرافیائی رسائی اور یورپی یونین تک ترجیحی تجارتی رسائی کے ساتھ، پاکستان بے پناہ کاروباری مواقع فراہم کرتا ہے۔’
فورم میں اعلیٰ سطح کے پالیسی ساز بشمول وزیر اعظم، وزرائے خزانہ اور تجارت، پاکستان اور یورپ کے کاروباری رہنما اور سی ای اوز، یورپی انویسٹمنٹ بینک جیسے مالیاتی ادارے، سرمایہ کار اور دیگر اہم اسٹیک ہولڈرز اکٹھے ہوں گے۔
دو روزہ فورم کے دوران کلیدی شعبوں (بشمول زرعی کاروبار، توانائی اور قابل تجدید توانائی، گرین لاجسٹکس، فارماسیوٹیکلز، آئی ٹی اور ٹیکسٹائل) میں پاکستان کی صلاحیت، اختراع اور بہترین طریقہ ہائے کار کو پیش کیا جائے گا۔
یورپی یونین کی سفیر ڈاکٹر رینا کیونکا نے کہا، ’ یورپی کمپنیاں پاکستان کو ایک ممکنہ کاروباری منڈی کے طور پر تسلیم کر رہی ہیں۔ یہ فورم یورپی اور پاکستانی کاروباروں کے درمیان تعاون کو مضبوط بنانے، دو طرفہ تجارت کو گہرا کرنے اور اقتصادی شراکت داری کے لیے نئے راستوں کی تلاش کے لیے ایک اہم پلیٹ فارم کے طور پر کام کرتا ہے۔’
یورپی یونین کی سفیر کا مزید کہنا تھاکہ یہ فورم پاکستان کے لیے گلوبل گیٹ وے کے مواقع سے فائدہ اٹھانے کا بھی ایک موقع ہے۔
مخصوص بزنس ٹو بزنس اور بزنس ٹو گورنمنٹ میٹنگز، دلچسپ مباحثوں، مخصوص نمائشوں کے علاوہ، فورم یورپی یونین-پاکستان بزنس نیٹ ورک کا آغاز بھی کرے گا، جس میں پاکستان میں سرگرم 300 سے زیادہ یورپی کمپنیاں اکٹھی ہوں گی۔
اعلامیہ میں کہا گیا ہے کہ یہ فورم ’مضبوط تر ساتھ‘ کے جذبے کے تحت پاکستان اور یورپی یونین کے درمیان اقتصادی تعلقات کو مضبوط بنانے میں ایک اہم قدم کی نشاندہی کرتا ہے، جس سے بہتر تعاون اور باہمی خوشحالی کی راہ ہموار ہوگی۔
لائیو ٹی وی