اسلام آباد: پاکستان کرکٹ بورڈ(پی سی بی) نے احمد شہزاد کی سری لنکن کھلاڑی تلکارتنے دلشان سے گفتگو اور ادا کیے جانے والے مذہبی کلمات کی تحقیقات شروع کر دی ہے۔

احمد شہزاد نے سری لنکا کے خلاف ہفتے کو ہونے والے آخری ایک روزہ میچ کے دوران دلشان مذہب پر مکالمہ کیا تھا جسے کیمرے نے ریکارڈ کر لیا ۔

ڈریسنگ روم واپسی پر ہونے والی اس ریکارڈنگ میں سنا احمد شہزاد کا دلشان کو مخاطب کرتے ہوئے کہنا تھا کہ ‘اگر تم غیر مسلم ہو اور مسلمان ہو جاتے ہو تو چاہے تم نے اپنی زندگی میں جو بھی کیا ہو، تم سیدھے جنت میں جاؤ گے’۔

ریکارڈنگ میں دلشان کا جواب تو نہیں سنا جا سکا تاہم ان کے کسی جملے کے جواب میں شہزاد نے کہا کہ ‘پھر آگ میں جانے کے لیے تیار رہو’۔

بورڈ نے اس معاملے پر احمد شہزاد کو بدھ کو پی سی بی ہیڈ کوارٹر طلب کیا تھا۔

پی سی بی کے جنرل منیجر میڈیا آغا اکبر نے کہا کہ احمد شہزاد نے بورڈ کو بتایا کہ ‘یہ ان کی دلشان سے ذاتی گفتگو تھی’ اور بورڈ اس معاملے کی ابھی تحقیقات کر رہا ہے۔

پاکستان کو اس میچ اور سیریز میں شکست کا سامنا کرنا پڑا تھا۔