ستیا' اب نئے انداز میں'
انیس سو اٹھانوے میں انڈر ورلڈ گینگسٹر پر بننے والی بلاک بسٹرفلم ستیا کا سیکوئل بہت جلد سینما گھروں کی زینت بننے جارہا ہے جس کا نیا ٹریلر جاری کردیا گیا ہے۔
ہدایت کار رام گوپال ورما کی انڈرورلڈ کے گرد گھومتی اس فلم کو ایم سمانتھ کمار ریڈی نے پروڈیوس کیا ہے جس کی کہانی ستیا سے یکسر مختلف ہے جبکہ اس کی کاسٹ میں بھی زیادہ تر نئے اداکار شامل کیے گئے ہیں۔
ستیا کی کہانی ممبئی آنے والے شخص کے گرد گھومتی تھی جو اس وقت کی انڈر ورلڈ دنیا میں پھنس کر رہ جاتا ہے تاہم ستیا ٹو کی کہانی ایسے شخص کے گرد گھوم رہی ہے جو ممبئی آنے کے بعد جرائم کی دنیا انڈر ورلڈ کو اپنے رنگ میں ڈھال دیتا ہے۔
جرائم کی دنیا کے گرد گھومتی ایکشن اور تھرل سے بھرپور رام گوپال ورما کی یہ فلم رواں سال اکتوبر میں سینما گھروں کی زینت بنائی جائے گی۔
