شوہر کو بوسہ دینے کی تصویر پر تنقید کرنے والوں کو ثروت گیلانی کا کرارا جواب
پاکستان کی نامور اداکارہ ثروت گیلانی اس وقت یورپ میں اپنے شوہر، اداکار و ڈاکٹر فہد مرزا کے ہمراہ چھٹیاں منا رہی ہیں جبکہ یہ دونوں اس ٹرپ پر لی گئی تصاویر اور ویڈیوز اپنے سوشل میڈیا اکاؤنٹس پر بھی شیئر کررہے ہیں۔
حال ہی میں فہد مرزا نے اپنے انسٹاگرام اکاؤنٹ پر ایک تصویر شیئر کی، جس میں وہ اپنی اہلیہ ثروت گیلانی کو بوسہ دیتے نظر آئے۔
اس تصویر کے سامنے آتے ہی یہ فوری طور پر سوشل میڈیا پر جنگل کی آگ کی طرح پھیل گئی، جس کے بعد متعدد افراد نے دونوں اداکاروں کو شدید تنقید کا نشانہ بنایا۔
کسی نے کمنٹ میں لکھا کہ 'یہ دونوں بھول گئے ہیں کہ ان کا تعلق پاکستان سے ہے اور یہ مسلمان ہیں' جبکہ کسی کا کہنا تھا کہ ان کو ایسی حرکت کرتے ہوئے شرم آنی چاہیے۔
تاہم اس تنقید پر فہد مرزا خاموش رہے لیکن ان کی اہلیہ ثروت گیلانی نے اب تنقید کرنے والوں کو کرارا جواب دے دیا ہے۔
ثروت گیلانی نے اپنے انسٹاگرام پر ایک پوسٹ شیئر کی جس پر لکھا تھا کہ 'میں ایسی ہی ہوں، کسی نے آپ سے یہ نہیں کہا کہ مجھے پسند کریں'۔
اداکارہ نے لکھا کہ اس دنیا میں موجود نفرت کرنے والے تمام افراد!، 'اگر مجھ سے اتنی ہی نفرت ہے تو مجھے فالو کرنا بند کریں، آپ مجھ پر تنقید نہیں کرسکتے، میری کامیابی، میری محبت اور میری خوشیوں سے مت جلیں، میں نے بہت محنت کے بعد یہ سب حاصل کیا'۔
ثروت گیلانی کے مطابق 'ایک لڑکی جس نے دنیا کا سامنا کرنے کے بعد یہ مقام حاصل کیا، اس کے لیے آپ کی سوچ اہمیت نہیں رکھتی، آپ مجھے نیچا نہیں دکھا سکتے، اپنی سوچ میں بھی (ایسا) نہیں کرسکتے، اگر سلیپریٹیز کچھ نہیں کہتیں اس کا مطلب یہ بالکل نہیں کہ آپ کو ان پر تنقید کرنے کا حق حاصل ہے'۔
اداکارہ نے اپنی پوسٹ کے اختتام پر لکھا کہ 'اس وقت بہت ضروری تھا کہ آپ لوگوں کو پیار سے ہی صحیح پر خاموش کروایا جائے'۔
اس ٹِرپ کے دوران ثروت گیلانی اور فہد مرزا کی ملاقات بولی وڈ ہدایت کار و پروڈیوسر کرن جوہر سے بھی ہوئی جن کے ہمراہ اداکارہ نے ایک تصویر بھی شیئر کی۔
اس کے علاوہ فہد مرزا نے ان کے ہمراہ ایک ویڈیو بھی شیئر کی جس میں کرن جوہر نے پاکستان کے مداحوں کے لیے پیغام بھی دیا۔
خیال رہے کہ ثروت گیلانی اور فہد مرزا نے 2014 میں شادی کی تھی اور یہ فہد مرزا کی پہلی جبکہ ثروت گیلانی کی دوسری شادی ہے۔
لائیو ٹی وی